обновлено: 12:02, 26 ноября 2025
Лух Авт
Рут ясаӊ уятман – еӆӆы юш пуншантаӆ
Кашӊ таӆ там порайн, Ас потты тыӆащ 26-28-мет хатӆатан, Пулӊават вошан ашкуӆа няврэмат «Арктической олимпиадая» актащиӆат. Па таӆат пиӆан артаӆаман тампуш аршак няврэм ёхтас, хольмаӊ пеӆа йи хоята йис. Ямал мув тумпийн Красноярской край, Долгано-Ненецкой автономной округ, Коми Республика.
Ин муӊ туняӆ ёхтыӆыйм няврэмат пиӆан па уйтантысув. Туняӆ эӆты вантман ӆув ин ант еӆэмӆат, таканшак потарӆат, хоты там уйтантопса манаӆ, иса уйтӆат. Щит шеӊк ям.
Кашӊ таӆ Приуральской район Охсар пухаӆ ашкуӆа-интернат эӆты Ольга Николаевна Пандо няврэмат тутӆыйӆ. Рут ясаӊ щиран касты хара Павел Иванович Вэненго ёхтас, ӆув нийӆмет классан утаӆтыйӆ. Рут ясӊаӆ шеӊк яма уйтӆаӆӆы, ант тахрамтыман потраӆ туӊа-щира па ошаӊа-щащаӊа тусӆы. Аӊкеӆ-ащеӆ тащ хотан яӊхӆаӊан. Щи веран, ханты мир уӆапса еӆӆы туты хоятӆув кутан хонна ханты ясаӊ хуӆты рахаӆ.
Краеведение щиран Анжелика Семёновна Кондыгина касты ёхтас, ӆув яртъяӊмет классан утаӆтыйӆ. Там еӆпийн няврэмат ёӆан ӆэщатысат, ин куман масайт потар ханшапты па хоятат ещаӆ ясаӊ ястаты. Анжелика потар тувмаӆ тумпийн хонна ӆуӊтар ӆуӊтас, тухаӆ хоятэм сэмъйиӊкаӆ хонна эсӆамтыйс. Щикем щи ӆув ястам ясаӊӆаӆ сам хара ӆоӊксат.
Аратаӆан там уйтантопсая няврэмат Ямал мув 95-мет таӆа, па Воӆаӊ Ляль порая потрат ӆэщатсат. Щишан, кашӊ хоят ӆыпийн, сам вуран ляль шук верат хонна ӆыӆӊат. Кашӊ хоттэӆ эӆты рутӆаӆ Воӆаӊ Ляля маныӆысат, щи юпийн па атаӊ-хатӆ рупитысат. Ун овращӆаӆ па щащиӆаӆ эӆты ищипа хуӆӆысат, муй хорпи шукаӊ пора ус.
Там касапса мохты ныӆа, муй хорпи рупата районат па вошат хуват няврэмат утаӆтаты хоятат верӆат. Сам хошиман утаӆтыты няврэмӆаӆ пиӆан рупитӆат, касапсаята тутӆыӆӆаӆ. Па ӆапатан этты газетайн ханшӆув, хоты иуӆтыя там «Арктической олимпиада» манас, хойтэм нох питас. Там уйтантопсаята пиӆтащиты няврэмат еӆӆы хатӆатан, ун тахаята утаӆтыты мантэӆ порайн тата нох питам верэӆ ищи ӆуӊатӆа. Щишан, тухаӆ няврэм хонна экзаменӆы еӆӆы утаӆтыты вуты верытӆа. Щи веран еӆӆы юш пуншантаӆ, па аратаӆ вер кентат манты питаӆ.
Няврэмата ястаӆув, ищиты еӆӆы яма утаӆтыты, кашӊ касапсая пиӆтащиты, муван-йиӊкан уӆапса па рут ясӊан яма уйтты. Утаӆтыты нэӊата юр па щём понты яӆап няврэмат воӆаӊ касапсаята тутӆыты ураӊан.
Аллина Тоярова ханшам потар
