Лух Авт
Рут ясаӊ верат нох аӆамты ураӊан
Кимет пуш «Информационные технологии и языки народов России» стратегической сессия Москва вошан манас. Воӆаӊ хоятат Яндекс, Сбербанк, федеральной агентство, университетат па институтат, щи тумпийн ясаӊ пиӆан рупитты хоятат яха акатсайт. Хус моӆтас регион эӆты хоятат ёхтыӆысат.
Ямал мув эӆты щий яӊхсат: Светлана Тусида — Овс мув шимӆаӊ мир хоятат верат туӊматты департаментан рупитаӆ, ур ясаӊ щиран уӆты эксперт; Наталья Вануйто — АНО «Ямал-Медиа» телевидение хоща Овс мув шимӆаӊ мир хоятат ураӊан этӆыты потратан кущая уӆ; Галина Косыгина, ЯНАО Национальной ӆуӊтап хотан рупитаӆ. Ӆув потарсат, муй хорпи верат Ямалан верӆайт ясаӊ шавиты ураӊан.
Кашӊ пуш еӊта пасан суран актащитыйн, аӆ хоятат воӆаӊ ант уйтӆат, муй эӆты вер манаӆ па муй тыйӆ. Ин номас понтса интернет мохты ясаӊ шавиты вер туӊматты. Щишан, кашӊ хоят ешауӆ верытаӆ рут ясаӊан ханшты, кутӆаӆан айкеӆ китты. Ант уйтты ясӊаӆ хоты щащӆ па ханшӆа — Яндексан уйтты.
- Ямал ӆоватан няврэм утаӆтыты 40 тахайн ханты, ур, селькуп, саран ясаӊ туӆа;
- 4700 хоят Овс мув шимӆаӊ мир ясаӊ утаӆтаӆ;
- 3676 ур ясаӊ утаӆтаӆат;
- 761 — ханты;
- 171 — селькуп;
- 92 — саран;
- 58 утаӆтыты нэ па ху.
Там уйтантопса эӆты каматса ясаӊ Наталья Тэрковна Вануйто ястас: «Кат хатӆ сора манапсат. Там сессия шимӆаӊ мир хоятат яӊмет таӆа постаман уӆ. Ин искусственной интеллект пиӆан кашӊ пуш уйтантыӆув, хошты хоятат кутӆаӆан рут ясаӊан ханшӆтантыӆат.
Кашӊ регион ун рупата вераӆ Яндексан рут ясӊаӆ еӆӆы хатӆатан мощатты уранан. Тухӆат 100 щёрас предложений масат, щит оӆаӊ ят. Актащам хоятат потарсат, муй хорпи верат там верты рупатайн яма манӆат, муй хоща па тахрамтыӆат. Ямал веӆщи там рупатайӆ питщаӆӆы. Шеӊк, ӆуӆан, ям ус, хун рут ясӊаӊ СМИ там рупатая пиӆтащсат. Ванты, муӊ хощаев ар ям потар акамман уӆ. Корпус верты порайн шеӊк, ӆуӆан, нётас. Куш ур ясӊаӊ, куш ханты ясӊаӊ.
Щита ма потарсам, муй хорпи рупата АНО «Ямал-Медиа» хоща рупитты хоятат верӆат, куш газетайн, куш телевидение, куш подкастат хоща. Лингвистат, программистат ястасат, ӆув ант тайӆат тамащ ханшам па нёхты хоран этӆыты потрат.
Муӊ округеван ар хоят, хой ӆув рут ясӊаӆ самаӊа тайӆаӆӆы па еӆӆы шавиты, туты ӆаӊхаӆ. Щи хоятат ищи мосаӆ там рупата верты порайн вохты. Рупата щикуш ӆаварт, туп муӊ яӆап мутрайт онтасан ясӊев шавиты верытӆэв».
Аллина Тоярова ханшам потар
Авторы
Лух Авт
Темы