обновлено: 07:21, 06 ноября 2025
Лух Авт
Рут ясӊат шавиты верат эӆты потар туса
Хащам ӆапатан Хон Петра вошан «Овс мув рут ясӊат фестиваль» VI мир кут научно-практической конференция манас. Хон мув ар суӊ эӆты хоятат щи пиӆтащисат.
Ямал мув эӆты щи Пулӊавт, Ӆорвош па Кев леп районӊан эӆты мохет яӊхсат. Щит няврэм утаӆтаты, шавиты, рут ясаӊ яма уйтты, айкеӆ верты хоятат. Ӆув рут ясаӊӆаӆ еӆӆы туты верат эӆты потар тусат. Россия хон муван ар мир уӆ, щи онтасан рут па ар. Щишан там таӆ щи вер эӆты потартӆа. Кат почётной мойӊ хоят ус: РФ Федеральной собрание Государственной Дума депутат Дмитрий Погорелый па доктор филологических наук Андрей Кибрик, РАН нэмпи рут ясаӊ утаӆтыты Институт куща.
«Мир кут ар рут ясаӊ» секцияйн рут ясӊат яма уйтты хоятат, ханты, ур, чукча, нанай па па хон мув ясӊат еӆӆы туты па шавиты верат эӆты ястасат. Хантэт эӆты щита Алексей Эдуардович Конев Ващъёхан вош эӆты, Ольга Николаевна Пандо па Оксана Петровна Лонгортова Охсар вош эӆты усат. Щи хоятат уӆты тахайӆаӆан хоӆ няврэмат пиӆан рупитӆат, ханты ясаӊ шавиты па еӆӆы туты ураӊан ун онтас верӆат.
Яӊхам верӆаӆ эӆты Ващъёхан ашкуӆайн няврэмат ханты ясӊа утаӆтаты ху Алексей Конев каматса ясаӊ ястас: «Там форум кашӊ таӆ маныӆыйӆ. Ма ты оӆаӊ пуш ёхтыӆысам. Нумасӆам, тамащ актантопсайт рут ясӊат шавиты ураӊан шеӊк мосӆат. Тата яӆап нопсат, яӆап щират оша пайтты рахаӆ.
Там уйтантопсайн ма «Нохар юх пухар» няврэмат ураӊан верты актантопса проект этаӆтасам. Щит муӊ Ӆорвош район няврэмӆув «Живун» парк-музейн уйтантыӆат, щита яӊ хатӆ уӆӆат. Щи хатӆат манты сыс няврэмат ханты мир уӆапса эӆты ар щир, вер нопса пайтӆат. Ма щита энамты ёх пиӆан вожатыя рупитӆам па ханты ясӊа утаӆтаӆӆам. «Нохар юх пухаран» щутщаты сыс, эвет па похат яӊ-ветхощьяӊ ясаӊ торӆы оша пайтӆат па потарты питщаӆат. Щиты ханты няврэмӆув шоши мир уӆапса верат моштаӆат».
Охсар вошан Кевлеп районан МДОУ «Хатӆые» садикан няврэм шавиман рупитты нэ Оксана Лонгортова ищи фестиваль манаман потар тус. Тувам потраӆ эӆты тамиты ястас: «Ма ай няврэмат пиӆан рупитӆам. Щишан потартсам, хоты ма ӆувиӆаӆ утаӆтаӆӆам. Ванты, ай няврэмат веӆщи потарты утаӆтыӆат, ма ӆувиӆаӆ ханты ясаӊан мувев эӆты потартӆам, муй войт муван уӆӆат, муй пормасат эӆты хоты ястаты мосаӆ. Щиты ӆув хой ясӊат ищипа уйтӆат, потартэӆ кутан ястаӆат. Манэман щиты щи няврэм шоши мир уӆапса, рут ясаӊ оша паятаӆ».
Шеӊк ям, хун щимась тахаята ханты хоятӆув яӊхӆат, вантӆат, утаӆтыӆат па ёхи ёхаттэӆ юпийн си верат эӆты еӆӆы потартӆат, ханты ясӊев еӆӆы туӆат.
Валентина Рохтымова ханшам потар
