Лух Авт
Рут мувӆаӆа касаӆӆат
Сус пора. Айн-айн турмев таӆ пеӆа керӆаты питас. Хоятат ищи таӆ уӆапсая ӆэщатыты питсат. Вуӆэӊ ёх ӆуӊ уӆты хотвоӆӆаӆ эӆты рут мувӆаӆа касаӆӆат, тащӆаӆ таӆ щахарӆаӆа воштаӆӆаӆ.
Кеван ӆонщ питас тащ ёх вуӆэӊ ухӆа, ӆонщхопа ӆэӆсат. Онасӆаӆ ӆуӊ хуват яма войн катӆам хоптыйн кирсаӆӆаӆ. Там ванан МСП «Мужевское» няӆмет тащан рупитты ху Эдуард Лонгортов айкеӆ верас: «Таӆ сус толах ар ус, вуӆыӆув толах юпийн хухаӆсат. Щишан иса мосас вантман тайты. Туп патлама атат йиты питсат, мохты кат хоятан ат ӆаваӆты питсув. Оха манты вуӆыӆув сыйӊ сохаӆан, ӆуӊханщапан ярсаӆӆув. Муӊ ин Саран муван уӆӆув. Тащев аяӆта Кев ова воштасэв. Мосванан тата еша вотас ус, ӆонщ питас. Щаӆта мелак турам ёхтас, кера, еӊка йис. Щишан вуӆыӆува ӆаварт ӆэтот хирты».
Хоты ин тащ хотаӊ нэӊат верӆаӆ манӆат, МСП «Мужевское» оӆаӊмет тащан рупитты нэ Римма Пырысева ястас: «Муӊ сусэв яма манас. Ёнтасты ураӊан нёплув, молщаӊ пон ӆэщатсам, татаӆтсам. Ма нёхи сораӆтсам па саӊхартсам, таӆа сопасӆасам. Вай иӆам торн сухатсам, тахар версам. Там тыӆащан касаӆты питсув. Ӆонщ хуват манты кен, Кев сора вуншӆэв. Ӆонщ арашак ки йиӆ, хоӆна ямшак питаӆ. Ин хой тахайн вуӆыӆува ухаӆ таӆты вольк. Таӆ уӆты мувӆува Ас потты тыӆащ хоӆатыйн веӆщи ёхатӆув».
Вуӆэӊ мохет яма ат касаӆӆат, тумтака рут мувӆаӆа ат ёхатӆат, войӆаӆ аратэӆан таӆ хотвоӆӆаӆа ат воштаӆӆаӆ.
Валентина Рохтымова ханшам потар
Авторы
Лух Авт
Темы