Лух Авт
Рут мувеӆ па ясӊеӆ яма уйтты веран кассат
Ас потты тыӆащ 26-27-мет хатӆатан Пулӊават вошан ашкуӆа няврэмат Арктической олимпиадая актащисат. Нийӆхус няврэм Пулӊават, Муравленко, Ӆапатнаӊк, Новый Уренгой, Ямальской, Приуральской, Надымской, Пуровской, Тазовской, Красноселькупской районат па Коми Республика эӆты ёхтыӆысат.
Там пуш катхощъяӊ няврэм ӆув рут муваӆ эӆты потар туты касты хара пиӆтащийс. Шеӊк щаль, рут ясӊаӊ касапсайн туп хут хоят ус. Ӆув кутэӆан йи хоят ханты мир эӆты, па йи хоят селькуп мир эӆты, няӆ хоятэв ур ёх мир эӆты. Ӆорвош район эӆты нэмоӆты хоят ант ёхтыӆыйс. Мосаӊ ясаӊ тайты хоятэв хоӆас, хойн уйтӆа.
Там касапса мохты ныӆа, муй хорпи рупата районат па вошат хуват няврэмат утаӆтаты хоятат верӆат. Сам хошиман утаӆтыты няврэмӆаӆ пиӆан рупитӆат, касапсаята тутӆыӆӆаӆ. Каматса ясаӊ Надежда Максимовна Сязи ястас, ӆув Пуровской район Тарко-Сале вош эӆты ёхтас: «Ма ар таӆ Тарко-Сале ашкуӆа-интернатна рупитӆам. Няврэмат история па обществознание урокатна утаӆтаӆӆам. Муӊ ашкуӆаевн ар ур па селькуп няврэм. Там йисан па мир няврэм ищи тэӆые, ӆув кутэӆан рущат, хатанят… Верытты няврэмӆув кашӊ пуш олимпиадаята па па щир касапсаята тутӆыӆӆув. Ин муӊ мувев уйтты щиран эви тусам. Тамащ уйтантопсайт муӊева шеӊк мосӆат. Ванты, щи порайн ныӆа, хоты наӊ рупитӆан, тата па потарӆаюв, хоты тусшака няврэмат пиӆан рупитты мосаӆ. Аратаӆан вантӆэв, касапса хоты сахат маныӆыйӆ. Артаӆаӆэв, па папуш кеша касапсая ӆэщатыӆув. Шеӊк ям вер. Кашӊ вош па курт эӆты аршак хоят тый ат ёхтыӆыйӆ, касыӆыйӆ».
Кат хатӆ сора манамтас, нох питам няврэмат нэмӆаӆ ястасайт. Яма рупитмеӆ ураӊан Павел Баякин Красноселькупской район па Марина Тайшина Кев сыӆ район эӆты нэман юкантам мойӆапсайн мойӆаптасайӊан.
«Арктическое краеведение» касапсайн Джульетта Тэсида Тазовской район эӆты па Вера Окотэтто Кев сыӆ район эӆты призёрата йисӊан. Оӆаӊ тахая Ева Кузьмина Ӆапатнаӊк эӆты этас. Ёхтыӆыйм хоятата умащ ус ӆув верам рупатайӆ вантты па хуӆантты, щи веран жюри хоща уӆам хоятатан постаса.
«Рут ясаӊ» номинацияйн Тамара Яр Тазовской район эӆты па Алексей Тайбери Кев сыӆ мув эӆты хуӆмет па кимет тахая питсаӊан. Оӆаӊ тахая Ольга Яптик этас, ӆув Ямальской район эӆты ёхтыӆыйс.
Там касапсайн няврэмат па утаӆтыты нэӊат хоӆыя мойӆаптасайт. Овс мув шимӆаӊ мир верат туты департамент, «Ямал-потомкам!» Ассоциация, ханты ясаӊан этӆыты «Ӆух Авт» па ур ясаӊан этӆыты «Няръяна Ӊэрм» мойӆапсайт ӆэщатсат.
Няврэмата ястаӆув, ищиты еӆӆы яма утаӆтыты, кашӊ касапсая пиӆтащиты, муван-йиӊкан уӆапса па рут ясӊан яма уйтты! Утаӆтыты нэӊата юр па щём понты яӆап няврэмат воӆаӊ касапсаята тутӆыты ураӊан. Тумтак ёш, тумтак кур!
Аллина Тоярова ханшам потар
Авторы
Лух Авт
Темы