Лух Авт
Рут мувеӆан ротая уӆӆат
Тащ хотан уӆты хоятат ӆув ёшӆаӆан ӆувиӆаӆ уӆты кеша муй иса верӆат. Там йисан мосаӊ еша яӆап мутраята, машинаята питсат. Туп ищипа арпелак верӆаӆ ёша-кура верты мосӆат. Щишан вуӆы хотан туп каркам па юраӊ хоятат яӊхӆат. Ванты, хоят еша лэнь ки, вуӆыӆаӆ лакки манӆат, хотаӆ потӆа, хорам ханшеӊ ӆуматты сох ант ӆуматаӆ, пормасӆаӆ понты ураӊан ухаӆ тайты ант питаӆ… Щишан вутан кашӊ ху, муй нэ ӆув вераӆ торӆы верӆаӆӆы ки, уӆапсайӆ иса туӊа-щира манаӆ.
Вуӆы шавиты — щит ма верэм
Вуӆы тайты тахайн икет тащ шавиӆат. Щит ӆув верэӆ. Тащеӆ иса яха ат ус па тумтака нюрматан па щахратан ӆарпиӆыйс. Щишан ӆув иса войӆаӆ вантман тайӆаӆаӆ. Ӆуӊан йи хоятан атаӊ-хатӆ шавиӆӆаӆ, таӆан хатӆ сыс ар хуйн яха акатӆаӆӆаӆ, ӆэтот тайты тахая воштаӆӆаӆ. Ин тащаӊ ёх Кев эӆты ханты мува ёхатсат.
МСП «Мужевское» ветмет тащ куща ху Станислав Лонгортов рупитты тащаӆ касӆаптыты вераӆ эӆты айкеӆ верас: «Ма ар таӆ вуӆы хотан рупитӆам. Вуӆы шавиты — щит ма верэм. Еӆпи иса вуӆыйн таща навраӆтысув, куӆ ӆонщаӊ тахайн ӆохан, ӆуӊан кеввурат хуват куран шушиӆысув. Ин мув ӆонщаӊ па так тахайн, арпелак ӆонщхопан яӊхӆув. Щиты кеншак тащ яха акатты, ухӆа кирты вуӆэт ант шукащӆат, ху ӆохан хухатӆыман ант метаӆ.
Ин муӊ таӆ хотвоӆӆува хоӆна касаӆӆув. Там ванан тащев Меӊк нюрма ёхтас. Тата пушас тайӆув, щахашак вуӆыӆув ӆуӊатӆаӆӆув па хорты войӆув атэӆ отрӆаӆӆув.
Щаӆта айн-айн вошат лепа манӆув. Ханты мува тащӆув воштаты кен, ӆув тохи сора манӆат. Кева воштаты ӆавартшак, вуӆыӆув иса таӆ щахарӆаӆа ёхӆы керӆаӆат. Щишан каматса хоятан воштаӆӆув, иса вантман тайӆаӆӆув. Ин хоӆна ӆонщ ухаӆ, вуӆэт нёта хирӆат. Таӆан ӆув артаншак порвой ӆэты питӆат, ванты, кен мощатты.
Ухаӆан ин щикуш тащ шавиты шимаӆ яӊхӆув, касаӆтэв порайн ищипа вуӆы кирты мосаӆ. Щишан муӊ ӆуӊан ухаӆ верӆув, хун пора тайӆув. Щи порайн ёх таща итан-итан яӊхӆат. Мувӊ бригадаеван хут ху рупитаӆ, вет хатӆ ёӆан уӆӆув, верантты кум шитӆув. Манэман, ӆонщхопан щикуш сора манӆан, ӆув муй ант рахты порайн шукаӆыты верытаӆ. Ухаӆан, куш айӆта манӆан, ищипа мосты тахая ёхатӆан».
Каркам нэ хоттэӆ пеӆа умащ вантты
Вуӆы хотан рупитты нэӊат ищи шеӊк ар па ӆаварт рупата тайӆат. Ӆув хотӆаӆан сыстам па хошам. Таӆ-ӆуӊ сыс ӆув икиӆаӆ, няврэмӆаӆ пиӆан иса хорам, хошам моӆщаӊан, сахан, вайн яӊхӆат — вантты умащ.
Тащ хотаӊ нэӊат верат эӆты Юлия Лонгортова МСП «Мужевское» няӆмет тащаӊ нэ потартаӆ: «Вуӆы хотан яӊхман вер ар. Таӆан уӆты щират эӆты еша потартӆам. Нох киӆӆам тут аӆӆам, мохиӆам аӆаӊсахат шайн йинщӆтаӆӆам. Ёх ӆойӆтыты хара манӆат. Щаӆта рамак пуляӊ ӆэтот кавартӆам, ӆонща яӊхамтыӆам. Хун ёхан, сойм пуӊаӆан уӆӆув, омлэп эӆты йиӊк аӆӆув. Хатӆ новия йиты порайн, туп матты ёӆ ёнтты рахаӆ. Ин хотӆуван станция тайӆув, нови тут уӆ, кум ки тайӆан, куш етан ёнтаса.
Таӆан карты кур аӆты ар юх мосаӆ. Ёхӆуван юхан туӆаюв, шупиӆаюв. Щаӆта хот пиӆнэӊем пиӆан халытӆаман. Хатӆ сыс каматса аӆтэӆан ёхи аӆӆаӆаман. Ин ям юх эватты «Дружба», халытты юх ун ӆайм уӆ. Еӆпи ащем, антем хотан яӊхманан, ӆаяман юх иӆ пайтты мосас, ёхи вуӆэӊ ухаӆан таӆты. Щаӆта кат пелак эӆты таӆӆыты картыйн шупиты. Халытсаӆӆув щи порайн ищи аӆ ӆаяман. Ин кеншак уӆты питас.
Етан икиӆув ёхи ёхаттэӆан моӆщаӊӆаӆ, вайӆаӆ сораӆтӆув, хой сосӆат, татаӆты мосаӆ. Яӆап вай иӆаман понты. Щиты тыеӆ-тохеӆ катӆантытэн эӆты, аӊкармаӆан — етная ювмаӆ».
Щиты щи мохет хатаӆӆаӆ сыстам па хорам муван манӆат. Ӆув пеӆаеӆ вантман самен аматаӆ, ханты уӆапса ант ёрэмаса. Щиты щи хоятат рут мувеӆан ротая уӆӆат.
Валентина Рохтымова ханшам потар
Авторы
Лух Авт
Темы