Лух Авт
Сак лопас – щит хорам
Харсойм куртан нэңие уӆ, туса сак лопсат вераӆ. Щит Татьяна Широкова. Татьяна Щаня муван энмас, эви опращ нэмаӆ Лонгортова.
Ай тэӆан ӆув вератты нэңат кутан ус. Антеӆ па хуӆам опеӆ, хоӆ умща вератӆат — ёнтасӆат, сохам сэвӆат, ашкуӆайн утаӆтымаӆан, интернатан ус, щита ищи эвет аӆ ант омасӆат, иса моӆты хорам верӆат. Щиеӆ вантман, ай Таня ищи туса вератты утӆас.
Ма ӆувеӆ инщассэм:
– Наң ай тэӆан щиты хорама сак каратӆан?
– Сак каратты хоты ай пора эӆты хошсам. Туп еӆпи щиеӆ шеңк верэм антом ус. Ар пелак моӆты ёнтсам — ернас, ханши, нуй... Хун эвеңаӆӆам айшакңан устан, хоӆна садика ант яңхсатан, сак каратты питсам. Ванты, аӆаңсахат хот верӆам хоӆ верӆаӆӆам. Щаӆта муй верты? Нумасӆам, сак лопас — щит хорам, кашң ханты нэңа умащ мойӆапса. Бурка сурат ищи хорапӆам. Еӆпи ма сак каратты мутрайн версам, станокан, ин катра ханты нэңат картам щиран — йинтапан па сохаман. Щиты щи тамащ хорамат верты питсам. Ин хоӆна хой мохет, ӆутты ураңан, заказ верӆат. Сусан рупатая этсам, туп щутщаты хатӆатан сак каратты кум шитӆам.
– Ӆаварт щиты сак каратты?
– Ӆаварт антом. Оӆңа ханши нэпека ханшӆэм. Щаӆта, щи ханшем вантман, сак лопсэм каратты питщаӆам. Яма омасман ки, кат хатӆ сыс йи сак лопас етшаӆэм.
Валентина Рохтымова ханшам потар
Авторы
Лух Авт
Темы