Лух Авт
«Сам ӆэрӆам. Струны моей души» ӆуӊтап этас
Хащам ӆапатан, ван хатӆап тыӆащ ихощъяӊмет хатаӆан, Пулӊават вошан аратаӆ мир Национальной библиотекайн актащийс. Щита ванта, Валентина Петровна Лонгортова «Сам ӆэрӆам. Струны моей души» ханшам ӆуӊтап мира этаӆтаса.
Там ошаӊ-щащаӊ ханты нэӊием ма хольмаӊ пеӆа вет таӆкем уйтӆэм. Леонтий Антонович Тарагупта пиӆан рупитыӆысман. Радио хуват потар тутӆысман. Щи порайн Валентина Петровна ищи потрат ханшиӆыйс. Ӆув куш ай потар ки ханшаӆ, щита, матты ки, таӆаӊ мир наӊ еӆпенан этаӆ.
Каматса ясаӊ ӆув ястас там ӆуӊтапаӆ эӆты: «Сэмъйиӊк суран, антома ювам хоятӆам потартыйм щират, уӆам-хоӆам щират нэпека постасӆам. Щаӆта па ма, потар шупӆам ханшсаӆӆам. Ясаӊӆам ӆэщатсаӆӆам. Муй ястаӆам? Хой нэпекем ӆуӊатты ки ӆаӊхаӆ — ӆуӊтаӆн. Хой кашӆ антом ки — па щит, нын веран».
Хоты сахат па хун там щащан ёхатса, ӆув ищи ястас: «Катра порайн хоятат иса атаӊ-хатӆ арыӆысат. Муӊ щи арат онтасан иӆ воямтысаюв, нох киӆӆыӆысув. Аӊкем манэма па яйема иса арыӆыйс. Кашӊ отэв ишканщап тайс. Мет оӆаӊан манэм арыӆӆы. Ванты, ма айшак. Ма шеӊк амтыӆысам: муй хорпи ёшииӆам, курыииӆам. Муй хорпи хорамаӊ вайн па сахан ма шушиӆыӆам. Щи хорпи ма хорасаӊ эвие… Яйема арымаӆ порайн, мохты нёсарщисам. Юхат хащ яха питыӆысман, хой ар ямшак.
Аӊкем муӊев ёнтопсаята хущиӆысӆы. Сумат похал ӆойӆ па ястаӆ: «Хоты наӊ, эвие, нумасӆан, ӆув кутӆаӆан пиӆнэӊат?» Ма ястаӆам: «Антом, ӆув опет-апщет». Ай апщем па ястаӆ: «Антом, ӆув ӆухас нэӊат. Саран нэӊат хорпет». Аӊкем онтасан ма араӊ-монщаӊ вер еӆӆы туӆэм. Ин ма щи веран ханшӆам. Щи порайн шеӊк умщаӊ па ойӊ хатӆат ма уӆапсаеман усат. Папуш няврэмат ураӊан ӆуӊтап этаӆ. Хота ханшсам, хоты сахат катра порайн няврэмат тащ хотан энмаӆысат, ёнтыӆысат».
Тамащ хоятат онтасан муӊ ханты мир ясӊев ант ушаӆ. Няврэмат ӆаӊхаман яӆпа этты ӆуӊтапат ӆуӊатты питӆат. Валентина Петровна, ойӊа-пищаӊа, йисаӊа-нуптаӊа! Ищиты еӆӆы муӊев амат тува, яӆап потрат, арат, монщат ханша, нэпеката ат йиӆат.
Аллина Тоярова ханшам потар
Авторы
Лух Авт
Темы