Лух Авт
Щикем умащ рут имем пиӆн уйтантыты…
Щиты амтаӊа Любовь Александровна Кондратьева (Гришкина) ястас, «Хатӆые» фестиваль манам порайн, рут нэӊаӆ Людмила Калистратовна Зубакина (Гришкина) шияӆамаӆн. Ма щи порайн там нэ пиӆн ищи уйтаӊа йисам, уӆапсэӆ эӆты инщассам.
Ӆув лялясам рут икеӆ эӆты потраӆ оӆӊитсаӆы:
– Ма кат ханты Гришкин па Куриков рутӊан эӆты йиӆам. Там таӆн муӊ Воӆаӊ Победа хатӆ вуш эӆты 80-мет таӆ постасув, щишн ӆаӊхаӆам муӊ рутэв эӆты лялясам хоятэв Алексей Кириллович Куриков эӆты еша ястаты. Ӆув Ас нопатты тыӆащ 15-мет хатаӆн 1923-мет таӆн Щуйӆ куртан Кирилл Иванович Куриков па Татьяна Дмитриевна Лельхова щемьяйн сэма питас. Поӆнават курт эӆты Воӆаӊ Ляля манас. Кимет Белорусской фронт хоща лялясас. Пошкан эӆты нёӆ эсаӆман Берлин вош унты вуракат воштас. Ляль эӆты мушаӊа керӆас, кимет группа инвалида йис. Ӆув нэмӆ Поӆнават куртаӊ кев хоран ханшман уӆ. Муӊ ӆувеӆ веккеша нумман тайӆэв.
Ма эӆтаем потартты ки, ма лыпат хойты тыӆащ 14-мет хатаӆн 1964-мет таӆн Поӆнават куртаӊ леккар хотн сэмӊаӆам пуншсаӆам. Ащем — Александр Иванович Гришкин, аньтем — Татьяна Максимовна, эви опращ нэмӆ Курикова ус. Ащем Тукъякаӊ куртаӊ хоят, аньтем — Щуйӆ куртаӊ нэӊа ус. Ӆын колхозн рупитсаӊан, щи тумпийн ащем хуӆ па вой веӆпасӆас. Муӊ щемьяевн вет няврэм ус: Геннадий, Владимир, Валентин, ма па Сергей.
Поӆнават куртан ай Люба эвие хатӆ сыс ай няврэмат тайты хота яӊхас, щаӆта ашкуӆая манас. 1982-мет таӆн, ашкуӆа етшаптамаӆ юпийн ӆуӊ порайн, ӆув хощаеӆ мояӊа ёхтас Иосиф Максимович Куриков (ин уйтаӊ леккар ики). Ӆув Люба апаӆнэӊаӆ Нижневартовск воша тусӆы. Тата ӆув пут кавартты нэӊа утаӆтыяс. Еӆӆы ястаӆ:
– Туп нэпекем щирн нэмоӆт порайн ант рупитсам. 29 таӆ Нижневартовск вошн «Местное время» нэмпи газета тутӆыты нэӊа усам. Там вошн ма Николай Фомич Кондратьев хоща икия мантсам, Алексей па Алёна няврэмӊаӆам сэма питсаӊан. Похем тата уӆ па рупитӆ, имеӊа йис. Эвем Сочи вошн хотат тыныты тахайн рупитӆ.
Любовь Александровна 2016-мет таӆ вуш эӆты щутщаты манас. Ӆув уӆапсайӆ хуват арыты верӆ мосман тайӆаӆы, щишн ям арат таӆ ёхӆы «Тор-Най» арыты тахая яӊхты питас. Еӆӆы потраӆ туӆӆы:
– Ма, ванты, Ун Ас эӆты ханты ими, тата муӊ Вах ханты ясаӊан арат утаӆтаӆув, манэма еша ӆавартшак, туп муй верты — утаӆтаӆам па арыӆам. Муӊ куща нэӊев Томской область Александровской район эӆты, щита уӆты хантэт еша Вах ёхан хантэт пиӆн ихорпи ясаӊ тайӆат, щишн ӆувеӆа кеншак.
Муӊ, ванты, хорамаӊ сценической ӆуматсохат тайӆув, щитат муӊ урӊева ателье хоща ёнтӆайт.
Ма щащем, аӊкаӊкем па аньтем эӆты сак каратты, пун верты па сэвты хошӆам, щишн итухӆ ишн па нэӊат, эвет щи верата утаӆтаӆам. Ма аньтем туса ёнтас па сэвас, ин ӆув ёнтам па сэвам ӆуматсохат Суматвош район катра пормасат шавиты хотн шияӆаты рахӆ.
Ин там пуш ма па ханты имет эӆты ӆуматсох, охшам ёнтты па ханты акань ёвартты утаӆтыӆам. Кашӊ пуш щимащ нэман харатн арсыр шоши мир верат эӆты оша пайтӆам.
Ёхи хащам порайн Любовь Александровна ястас, ӆувеӆа «Хатӆые» фестиваль шеӊк мостас. Ӆув щираӆн, тата арсыр шоши мир верат эӆты оша верты рахӆ — ванты, щи порайн тата научной мирхот, шоши мир нушайт туӊматты хар, «Пупи якхот», арсыр вантопсэт, утаӆтаты харат па па отат ӆэщатман усат.
Лыпат хойты тыӆащ 14-мет хатӆан Любовь Александровна Кондратьева 61 таӆа йис, щишн сэма питам хатӆаӆ кеша ар хошам ясаӊ ястаӆам. Аньтиенан партам, ащенан алям туӊ юш хуват ханты мир йис уӆапсэв шавиман шуша! Наӊ щемьяенан иса яма ат уӆ! Тумтака хув йис, хув нупат уӆа!
Людмила Шульгина ханшам потар
Авторы
Лух Авт
Темы