Лух Авт
Щирӆаӆ-пищӆаӆ савиман
Там лопасна ма нынан тус ясаӊ па каркам ныӊ пущщи лаваӆта ӆытӆам, Светлана Рокина — Красноселькуп эваӆт. Ӆув щита «Милосердие» центран ропытӆ, нэӊхэт эӆты нятӆ. Мин ӆув пиӆэӆна Надым васна каӆаӊаӊ нэӊхэт емаӊ хатӆна уйтантысман. Холам таӆ пеӆа манас хоты ийикеӆ антамми ювмаӆ, ертъяӊ няврем пиӆна отща хыщас.
Нявремӆаӆ онттыды сыс похална оллат, каникул порайна курт пеӆа касаӆӆат. Ийикеӆ ӆыӆаӊ олмаӆ порайна щирӆ вер пунсыӆыйс — хуӆ веӆты фермерской хозяйство, похлаӊ нэӊхэт ораӊна ропытты тахайт ӆэщатыйс. Ӆув пиӆэӆна вуӆ эвеӆ ӆуӊ сыс хуӆ веӆман нятас, нэпекат ӆэщатас. Нэӊхэт эӆты кон олтаӆ ораӊна, ӆув тут йиӊк, ӆытыт тотлисат. Мала кемна веритсат, нятсат, топ лолан ат ропытсат. Итта мур орна олапсы сокки вантӆэӆ, ӆэвасы ант йиӆат хуӆ веӆта.
«Ма ертъяӊ нявремам, вет ма эвем, ниӆ энмаӆта вусам. Мет вуӆ эвем мули ропытӆ, кимет эвем Тарко-Сале васна ропата пеӆа онттыйӆ, энмаӆта вуйм йикам Пулӊаватна ол. Отпуск порайна па хонты каникулат пинтщаӆат муӊ аратэӆна Пеляжье посӆна лайты курту пеӆа манӆу. Щит ийикем соӊат рот курт, ӆув тата йис тэӆна осат, каӆаӊ энмаӆсат. Ма ротам курт ищи таӆта сэӊк хувн ант ол, Тэмсыльки ёхан пеӆа лоӊты тахайна, олты хуват веӆпасӆаман па хуӆ веӆман осу. Итта щита нэматтыт ант ол, мета маса карра хат волат хыщсат, щит холна вуӆ ащем амтыӆыйм хатат осат.
Нявремӆам щиты энмаӆӆаӆӆам, хоты муӊ энмаӆтсаюв. Ай тэӆна хат ӆыпи ропата верта онттаӆӆам. Ясаӊна лавта сымаӆ, верна эттада масӆ, нявремат топ щи порайна онӆаӆат, хонты муӊ эттаӆэв. Мин вет эвеман, йик антам, щиты — Сания ащеӆ эӆты хуӆ веӆты тахайна сэӊк ямас нятас, итта хуӆ веӆта ки манӆ, таӆты юхы ант йиӆ. Мотораӊ па ланщ хапна яӊхта веритӆ. Итта Мила ӆув пеӆэӆ вантман ищи халап вантаӆ, хуӆ ӆарпатӆ», — Светлана Рокина лавас.
Касӊ таӆ Красноселькупна Амэт хатӆ еӆпийн «БЕРА» премия маӆа. Туняӆ Светлана Тимофеевна мет омащ амы нэм сытас.
«БЕРА» премия — щит щимащ амэт пущщи, хой анта топ ӆув нявремӆаӆ ораӊна мет воӆаӊ нэӊху, па нэӊхэт эӆты па нятта, мур кутна мет ям пелак эваӆт ӆувеӆ эттада.
Вера Лонгортова хансам потар
Авторы
Лух Авт
Темы