Лух Авт
Щущиет пиӆан рупитты энамты эви
Там сютсяты хатӆатан ай няврэмат шавиты хотатан па интернататан воспитателя рупитты хоятат емаӊ хатӆэӆ постаӆат. Там лопасан няврэмиет пиӆан веӆси рупитты питсям эви эӆты потрэм туӆэм. Сит — Мария Павловна Самсонова (Пырысева).
Мужи куртан энмас
Кимет таӆ Пулӊават вошан «Мувхор» нэмпи садикан щущиет пиӆан Мария Павловна Самсонова (Пырысева) рупитаӆ. Уӆапсайӆ эӆты тамиты ястас: «Ма Мужи вошан энампсам, сита утаӆтысам. Семьяеван няӆ няврэм уӆ. Ма мет ун. Кат ёх апси па йи эви апси тайӆам. Ашкуӆайн утаӆтымем порайн, «Хатӆ най» группая арыты яӊхсам. Колледжан па якты группайн яксам.
Аӊкем па аӊкаӊкем Асов курт эӆты. Аӊкаӊкем шуӊат — Любовь Прокопьевна Тогачева. Аӊкем — Надежда Валерьевна Самсонова (Тогачева).
Яртъяӊ класс етшамем юпийн, Пулӊават вош Ямальской многопрофильной колледжа утаӆтыты мантсам. Ай няврэмат утаӆтаты нэӊа етшаптасам. Вошан уӆты хасьсам. Аӊкем, апсиӆам па Пулӊаватан уӆӆат».
Таӆа йис, хоты рупитты питас
Щёхар тыӆасян таӆа йис, хоты ханты эвиев «Мувхор» няврэмат шавиты хотан рупитаӆ. Рупитты питсям порайӆ эӆты симась потар тус: «Ашкуӆайн рупата ант уйтсам, садика рупитты мантсам. Ай уӆмем порайн, иса утаӆтаты нэӊа уӆты ӆаӊхасайм. Апсиӆам кашӊ порайн иӆ омпсыӆысӆам па утаӆтасӆам: ханшты нэпекан мийӆысӆам, иса моӆты ханшсув, ӆуӊатсув, сюрытсув, оценкайн поныӆысӆам. Иса нумассам, няврэмат такан тайты питӆаӆӆам.
Туп па сирн этас. Ин ма ай няврэмат пиӆан рупитӆам. Мосаӊ ситы ямшак. Ашкуӆайн уншак няврэмат утаӆтаты мосаӆ. Сита па ӆаварт рупитты. Ин симась пора — няврэмат хусаӊат, ун хоята ант хуӆантӆат, ёхӆы хесьӆат. Ма нумастэман, туп хой шеӊк самаӊа няврэмат пиӆан рупитты ӆытӆа па рупатайӆ самаӊа тайӆаӆӆы, симась хоятат туп ай па ун няврэмат пиӆан рупитты верытӆат.
Ин группаема кат таӆ эӆты няӆ таӆ унты хольмаӊ пеӆа кат няврэм яӊхаӆ. Кашӊ хатӆ план хуват занятияйт маӆам, ким яӊхӆув. Таӆ сыс ма утся рупитсам. Там мосванан пиӆнэӊан понтсайм. Ин щущииӆам уншака йисат, ӆэты, ӆуматӆыты хошӆат.
Оӆаӊ порайн шеӊк ӆаварт рупитты ус. Иса нумассам, хоты кашӊ няврэм пиӆан рупатаем туты, аӊкиӆаӆ-асиӆаӆ пиӆан ясаӊ уятты. Пора хасяс, няврэмиет ма хосяем утӆапсат.
Кашӊ ай няврэмие ӆув уӆты хоттэӆаӆ, ӆув мираӆ эӆты ёхатаӆ. Ма рупатаем — ияха, ӆухсаӊа ат энампсат, ёнтсат. Ма асиӆаӆа-аӊкиӆаӆа потарӆам, нын няврэмӆын манэма шавиты масӆын. Ӆувиӆаӆа тата яма уӆты ураӊан, ма иса мосты сирн рупатаем туӆэм. Хун ӆув вантӆат, хоты ма нумман тайӆэм, муй хорпи ёнттот ӆув няврэмаӆ самаӊа тайӆаӆӆы, эвеӆ муй хорпи сэван охсохӆаӆ сэвты мосаӆ. Си порайн ӆув няврэмӆаӆ эӆты ант хурыӆат, пошхииӆаӆ пиӆан рупитты хоятэӆ ванан тайӆэӆ, пиӆтасяӊа уӆӆат.
Таӆ сыс няврэмӆам хося шеӊк хошисам. Сикуш ин ай щущиет пиӆан рупитӆам, туп еӆӆы русь ясаӊ па литература маты нэӊа утаӆтыты номас тайӆам. Ашкуӆайн шеӊк самаӊа си предметӊан тайсаӆӆам, шеӊк ям утаӆтыты хоятан утаӆтасайм».
Муӊ па, кашӊ няврэмат шавиман тайты хоятата мойӆапса ясаӊ китӆув. Нын воӆаӊ рупата верӆаты! Тумтака, ойӊа уӆаты!
Альбина Тырлина ханшам потар
Авторы
Лух Авт
Темы