Лух Авт
Сэма питам хатӆаӆ постас
Ван хатӆап тыӆащ хольмаӊ пеӆа хуӆмет хатаӆан Иосиф Никифорович Куртямов сэма питам хатӆаӆ постас. Там хащам 2024-мет таӆан ӆув ярсот пеӆа вет таӆа йис. Там хоятэв айӆат ёх эӆты куща ёх унты иса ям ясаӊан нумман тайӆа.
Ханты куртан уӆман, ай тэӆан хуӆ-вой веӆпасӆаты хошас. Хутхощъяӊ таӆ эӆты вуӆы хотан тащ шавиты хоята рупитты питас. Ар таӆ хутмет тащ хот кущая ус. Рупитмаӆ пораяӆан, тухаӆ таӆ вуӆэӊ тащаӆ няӆ щёрас унты энмиӆыйс. Ин там вераӆ хиӆыӆаӆан еӆӆы туӆа.
Зоя Ивановна ийимеӆ пиӆан щутщаты манман юпийн, Мужи воша нык охаӆсаӊан. Иосиф Никифорович рупатайӆы куртан па ант опсас: хоӆпат хушас, ӆохат, ӆупат, хуванат верас. Веӊӆаӆа па хиӆыӆаӆа веӆпасӆаты нётас.
Рупитмаӆан, ар пуш ишакты нэпекатан юкантыса, меваӆ посат тайӆ. Сэма питам хатӆаӆан, Ӆорвош район утхот эӆты, совет ветеранов, район па совхоз кущайӆаӆан ар мойӆапса ясаӊан ястаса, мойӆаптаса. Сама мосты ям хоятэӆ шавиман, няврэмӆаӆ па хиӆыӆаӆ иса ӆув пуӊӆаӆан уӆӆат.
«Аспохие, сыстам турам еша па еӆӆы пеӆа ватаӆты, уӆты нопсэн так ат уӆ, ясӊен торӆы ошаӊа тайи, эвиӆана еша кум, тамащ ям уӆапсайн еша па верита», ¬– Наталья Александровна Горшкова асэвеӆан мойӆапса ясаӊан ястаса.
Муӊ па газетаев хуват Иосиф Никифорович мойӆапса ясаӊан китӆэв. Уна ювам юпийн, тумтак уӆа, ёшӊаӆан, курӊаӆан щём ат тайӆат. Ван рут хоятӆана амат тувман, Турам Ащийн постам таӆӆан, Каӆтащ Аӊкийн партам юшен, патэӆ унты шуши.
Зоя Куртямова ханшам потар
Авторы
Лух Авт
Темы