Лух Авт
Сэман вантты умащ вантапса
Там ванан, Новосибирск вошан, йис пормасат шавиты хотан, шеӊк хорам па умащ «Ямал мув ханшет» нэмпи вантапса пуншса. Александра Ларионовна Юхлымова ермак щашкан эӆты ёшан щуртам ханшеӊ рупатайт щита этаӆтаӆайт.
Ямал мув ӆоват верантты па Новосибирской йис пормасат шавиты хотӊан кутӆанан яха рупитты нэпек ханшсат. Щи пора эӆты Новосибирск вошан кимет пуш тамащ вантапса верӆа. Туняӆ оӊат ӆов эӆты эвтам хорам хорат па пормасат тата этаӆтасайт. Тампуш па ермак щашкан эӆты верам охшамат, хорат, ернасат тусайт.
«Тами анта туп аӆ щуртам ханшет. Там матты ки, катра пора эӆты китам айкеӆат, хоты хантэт йис порайн веӆпасӆысат. Турмеӆ, йиӊкел, мувеӆ шавиман, ротая усат. Таӆ пора ищкет па ӆуӊ сыс хорам ольпат тата лакки ӆарпиӆаӆат. Хора понам войӆаӆ матты ки ин нох пурӆаӆат, еӆ шушмаӆат.
Тамащ рупата вертыйн, муй арат юр па ош понты мосаӆ. Кашӊ щашкан щелам ар пуш оляпан нёсытты, каврам аяман шошамты, пусты, сораӆты. Щи тумпийн, тыйты хораӆ вантты хорпия верты мосаӆ. Рупатайт ванттыйн, нумасӆан, нэпек нёсытты иӆампа кеншак, хун тамащ ващ ермак щашкан хораматты», — Новосибирской каш па вантапса верат туты воӆаӊ нэ Юлия Шуклина ястас.
Вантапса пуншам порайн, мойӊ хоятат кеша, мет оӆӊа Александра Ларионовна потар тус. Хоты ӆув номас вераӆ, маты щашкана муй хорпи хор понты. Рупатая тыйм хорат хоӆща уӆ па муй хорпи еӆӆы манты номпсат хоӆна тайӆ, хоятата ястас.
Тамащ ошаӊ, хорасаӊ па тус ёшаӊ нэӊие муӊ ханты хоятӆув кутан уӆ.
Зоя Куртямова ханшам айкеӆ
Авторы
Лух Авт
Темы