Лух Авт
Семьяеӆан ёх хоятӆаӆ хоӆ веӆпасӆыман усат
Ай тахайт потты тыӆась оӆаңмет хатӆа Ӆоркуртаң хуӆ веӆты ёх план хуват 174 тонна хуӆ масат. Таӆ сыс рыбоучасткаӆа 263 тонна хуӆ мосятты мосаӆ. Хасям тыӆасян веӆпасӆаты кашң хоятэв тонна моӆтас хуӆ мосятас. Хоты Ӆоркуртаң хуӆ веӆпасӆаты хоятат хуӆ мосятӆат, потрэв еӆӆы туӆэв.
Виталий Васильевич Русмиленко ар таӆ хуӆ веӆпасӆыман уӆ. Сит эӆты каматса ясаң ястас: «Ма 1991-мет таӆ эӆты веӆпасӆыты питсам. Ашкуӆа етшамем юпийн, мохты аңкема-асема нётсам, ӆув пиӆэӆан хуӆ веӆман яңхсам. Ӆув уӆман сыс хуӆ мосятыӆысңан. Си еӆпийн тащан яңхсатан.
Си юпийн яйңаӆам — Николай па Владислав пиӆан хоӆап омасты, ноптаӆты яңхсам. Николай яеман Пухарпана тутӆысайм. Сяӆта ма сирэман веӆпасӆыты питсам. 2003-мет таӆ эӆты Хишпанан усув. Ветӆэм таӆ сита рупитсам. Ун похем сита сэма питас. Нэпекӆы рупитсам. Си юпийн Горка вош рыбоучасток кусяйн — Борис Ефимович Харитонован нэпекан ӆэсятсайм. Сиӆта Ӆопхары рыбоучастка китсайм.
2011-мет таӆ эӆты ӆуңан яем Николай Васильевич пиӆан Ас-Хаша вар верты яңхӆам. Ӆув сита кусяя уӆ, ӆувеӆа нётӆам. Муй верты мосаӆ — иса уятӆам. Сита рупитты энамты похат утаӆтаӆӆам. Там таӆ ант рупитсам. Ин нэпекӆам ӆэсятӆаӆӆам па еӆӆы рупитты питӆам».
Альбина Тырлина ханшам потар
Авторы
Лух Авт
Темы