Лух Авт
«Северная лира» уйтантопса верса
Хасям ӆапатан Пулӊават вошан ОЦНК каш верты хотан «Северная лира» воӆаӊ уйтантопса верса. Ханты па русь ясаӊан монсят, потрат, ӆуӊтарат ханшты ханты хоятат яха уйтантысат. Вошаӊ па мойӊ хоятат ещаӆ Валентина Петровна Лонгортова, Геннадий Павлович Кельчин, Антонина Егоровна Сязи, Елена Алексеевна Шульгина, Дарья Ивановна Озелова-Чугаевская па Евдокия Езиковна Серасхова потар тусат.
Сикем ольпаӊ, самаӊ, вещкат уйтантопса тыйс. Ар мойӊ хоят ёхтыӆыйс, ханшты хоятат ям ясаӊан ястасайт па мойӆаптасайт. «Овас мувие» па «Мурхи сун» группайӊан ханшты хоятӆув ханшам арат, осьхулькайт арысат. «Сорни тутые» группая яӊхты ёх нарасъюхан ёнтсат.
Ма нумастэман, сит оӆаӊ пуш симась уйтантопса ханты мир кутан верман ус, хун ар ханты ханшты хоят яха акатса. Мет воӆаӊ, там газета этты порайн, яӆап таӆ тыӆась хольмаӊ оӆаӊмет хатаӆан Роман Прокопьевич Ругин па курк тыӆась оӆаӊмет хатаӆан Микуль Иванович Шульгин шуӊат сэма питам хатаӆӆаӆ постасӊан ӆуӆан.
Си уйтантопсайн Роман Прокопьевич Ругин, Микуль Иванович Шульгин па Прокопий Ермолаевич Салтыков шуӊат нумаӆмисайт па няврэмиетан ӆув ханшам ӆуӊтарӆаӆ ӆуӊатсайт.
Симась уйтантопса верты «Овас мувие» группая яӊхты нэӊата номпса ёхтас. Арыты группайн кусяя уӆты нэ — Татьяна Ивановна Енова, сит эӆты ситы ястас: «Муӊ хуӆам таӆ ОЦНК хота арыты яӊхӆув, монсят, ӆуӊтарат акатӆув, нэпекат, газетайт вантӆув, ям потрат, монсят ханшты хоятат пиӆан уйтантыӆув.
Хасям таӆан Дарья Ивановна Озелова-Чугаевская муӊ хосяев вохиӆысэв. Валентина Петровна Лонгортова ёхтыӆыйс. Пасан суран актысисув, шай йинсьсув, потрэмисув. Муй ураӊан симась уйтантопсайт верты питсув? Муӊ, арат арыты хоятат, шимаӆ ар тайӆув.
Валентина Петровна пиӆан каматса пуш уйтантысув. Ӆув ёхтыӆымаӆ порайн муӊева ястыӆыйс, хоты ханты ясаӊан яма потарты мосаӆ, ясаӊӆув туӊа-сира ат тыйсат, утаӆтасӆы. Муӊев хуӆам аран ханшсаӆӆы па мойӆасӆы. Уйтантымеван, потартыйс, инсясыйс, «Ханты нэ» ар ханшас. Унт эӆты шеӊк хорам аран мойӆасаюв. Араӆ ӆув рут муваӆ эӆты. Хоӆна йи ишкансяп ар ӆэсятас. Ма Ӆоракурт нэ, муй иса верты хошӆам. Анна Русмиленко — Кунавт тащаӊ мув эӆты. Ситы кашӊ арыты яӊхты нэӊев эӆты моӆты ай потар шупие ӆэсятас.
Сусан номасан ёхатсаюв, вошеван си арат ханты ханшты хоят уӆ, яха актасьты мосаӆ, уйтантопса верты. Тамхатӆ иты хоӆ ат ёхатсат, ӆув эӆтэӆ потарсат, ханшам нэпекӆаӆ эӆты ястасат.
Там уйтантопсая муӊ туп вошан уӆты ханшты хоятӆув вохсув. Еӆӆы пеӆа, па ар хорпи уйтантопсайт верӆув. Валентина Петровна па Дарья Ивановна пиӆан еӆӆы уйтантыӆув. Номас понтсув, Ямальской многопрофильной колледжан утаӆтыты энамты ёх хося яӊхты, ханты уӆапсаев альты. Мосаӊ хой ханты группайӆува арыты па нарасъюхан ёнтты яӊхты ӆаӊхаӆа, ханшӆтантыты верытӆат. Хоӆна Прокопий Ермолаевич Салтыкова постам уйтантопса ӆэсятты утсиӆув. Ханты уӆапсаев еӆӆы туӆэв, ханты хоятӆув пиӆан уйтантыӆув па няврэмӆув си вер пеӆа утаӆтаӆӆув».
Си хатаӆан шоши мир ёх Департаментан финансовой па правовой обеспечение отделан воӆаӊ специалиста уӆты нэ Светлана Ивановна Тусида каматса хоят мойӆаптасӆы. Дарья Ивановна Озелова-Чугаевская хасям таӆан нийӆъяӊ пеӆа вет таӆаӆ постас, мойӆапса нэпекан па мойӆапсайн юкантса.
«Ассамблея народов России» ЯНАО региональной отделение куся нэ Галина Яковлевна Косыгина па НКАХ «Пулӊават» куся ху Валентин Валерьевич Вальгамов яма рупатаеӆ туты ханты хоятӆув мойӆаптасӊан.
Сикем самаӊ уйтантопса тыйс, ар ханты хоят ёхтыӆыйс. Каш вантсат, ханшты хоятӆув пиӆан потрэмисат, хор версат па ям номасан ёхи мантсат.
Альбина Тырлина ханшам потар
Авторы
Лух Авт
Темы