Лух Авт
Шарапанаӊ ими
Йис тэӆан вуӆы шавиты ёх Кев пеӆа касаӆӆат. Ӆув щита таӆшуп кем яӊхӆат. Касаӆты юшӆаӆан, ӆойӆыты лотатан, хотвоӆатан камн хорпи умащ муват вантӆат. Кашӊ мув, хота хоят уӆ, нэм тайӆ: манты юшат, ёханат, нюрмат, нерат, калат, мони пайт. Щишан манты хоят хоӆта манаӆ — ӆэр.
Там ясӊев вуӆы хотаӊ хоятат эӆты манаӆ. Ӆув Кев пеӆа касаӆты юшеӆ хув… Вуӆы хотаӊ хоятат Кев тум пелка касаӆӆат, Емаӊ Кев ур шанш шоппи вуншӆат. Щишан щи таха йиӊк катна овты таха. Касӆыты юшан Кеваӊ мони пайт катра опращӆуван нэматан понтсайт.
Ун хоятат ястаӆат, щарс нох сормаӆ юпийн, щи верат усат. Тухаӆ нэмӆаӆ шеӊк ощхулят: ясаӊ, монщ, ар, па потар шупиет тайӆат. Ханты мув пелакан уӆты монет тамащ нэмат тайӆат: Сам поталы, Муйку мони пай, Ӆэв ики, Пун ими, Ош мони.
Саран мув пелакан уӆты мони пайт: Шарапанаӊ ими, Куляӊ мони, Ӆов мони па Ӆас мони. Монет ӆув хорасӆаӆан вой, момет, хоят хорпет. Хоӆта пеӆа таӆӆат, муй хорас тайӆат, щимащ нэматан понтсайт.
Ма ин Шарапанаӊ ими мони пай эӆты потарӆам. Там потар ма антем эӆты хуӆсэм. «Йи ханты ики ус. Ӆув айкеӆ хуӆас: Кев тум пелакан саран ики уӆ па эви ёӆан тайӆ. Ӆув па пох ёӆан тайӆ. Па похаӆа ястаӆ: «Яӊхӆаман, антен па щащен пиӆан наӊен пиӆан каншӆэман. Щаӆта актащсат, мойӊ хоӆ усат па ӆэӆапсат. Кев тум пелка ёхатсат. Хот ӆойӆ, ёхи ӆоӊксат, шайн йинщӆтасайт: потар, ясаӊ…
Щиты хуӆам хатӆ хащас, саран ики эвеӆ ант маӆӆы, ханты ики мойӆасӆы. Щитаӆн ёхӆы ӆэӆапсат. Мохет манам юпийн, саран ики хоӆап вантты манас, хуӆ воӆаӊа ант хойты питас, нумасаӆ щит ханты ики мутра верас. Пора хащас, ханты ики па номас понаӆ саран мува яӊхты. Мойӆапса патан понас, похаӆ ёӆан тащ шавиты хащас.
Саран хота ёхатсат, мой щира ӆоӊксат: шай, потар. Уӆтаӆ эӆты хуӆам хатӆ хащас, саран ики номпсаӆ ёвра. Саран икеӆан вуӆыйн мойӆасайт, щитэӆан ёхӆы ӆэӆапсат. Саран ики вуӆыӆаӆ ушты питсат. Нумасаӆ, щит ханты ики мутра верас.
Хув-ван пора хащас, ханты ики няврэмӆаӆ пеӆа потартаӆ: «Хуӆам пуш ох понӆа муӆ пеӆа, хуӆам пуш ӆарэмаӆа муӆ пеӆа, хуӆам пуш пойкащӆа Турам пеӆа. Ма па яӊхӆам хуӆмет юшем Кев тум пелка, ипуш па вуншӆэм Емаӊ Кев вур шанш».
Ёхтас саран икеӆ хоща, ин икеӆ камн, еша нопсаӆ шакман уӆ, ханты икеӆ пеӆа ястаӆ: «Пар наӊ урайӊ ики, хуӆмет юшен па ёхатсэн». Щитэӆан ёхи ӆоӊксат, шай, пасан. Щиты уӆтэӆ эӆты пора хащас, ёхӆы актащты пораяӆа йис. Саран икеӆ юха сэӊксаӆӆы, эвеӆ ант кашащаӆ маты.
Ястыйӆ: «Йи эви туп тайӆам, муй щирн маӆэм, хота уӆты ханты мув, Емаӊ Кев вур шанш шоппи ушты мосаӆ, щи хуват мув ма яӊхты ант верытӆэм, аӆ ликаща!» Щитэӆан ханты ики ӆэӆамтас ёхӆы юша. Муй номасан ханты ики манас хойн уятӆа.
Саран мув пелакан ёхан уӆ, нэмаӆ Шарапанаӊ ими, кимет пелакан па ёхан оваӆ — Амп ёхан. Кат ёхан кутан мони пай омасаӆ: вутаӊ понаӊ, кокошнекан. Щи мони пай Шарапанаӊ имия аяӆӆа. Матты ки ханты ики мутрайӊ уӆмаӆ.
Анна Талигина ханшам потар
Авторы
Лух Авт
Темы