Лух Авт
Шимӆаӊ мир хоятат Ассоциация 35-мет таӆаӆ постас
Хащам ӆапатан Хон мув воӆаӊ вошеван Овс мув, Щёпр па Хаӆэват Пелак шимӆаӊ мир хоятат Ассоциация 35-мет таӆ постаты актащисат. Няӆсот моӆтас делегат па мойӊ ёх хольмаӊ пеӆа ӆапат субъект эӆты ёхтыӆыйс. Няӆъяӊ мир йи пасан суран еӆӆы уӆапсаеӆ эӆты потар тусат.
Мет оӆаӊан Россия Президент Владимир Путин китам мойӆапса ясаӊ ястаса. Магомедсалам Магомедов Российской Федерация Президент Администрация куща ӆаӊкра уӆ. Хоты ӆув ястас, шимӆаӊ мир хоятат Ассоциация государственной власть пиӆан йи юр па юш понман шушӆат. Няврэмат туӊа-щира утаӆтыты, рут ясаӊ шавиты ураӊан ар рупата верман уса. Щи тумпийн, кашӊ мир йис ёхӆаӆ уӆапса инты унты шавиӆӆы па еӆӆы туӆӆы. Хон мувев атма питтыйн, аратаӆ мир муваӆ сайӆаты ӆойӆ. Шимӆаӊ мир ёх хоятат ин ищи ляль харан уӆӆат, мувев сайӆаман.
Камн мир Россия муван уӆ, ӆув уӆапсаеӆ шавиман тайты мосаӆ. Щи веран ун нётоп Овс мув, Щёпр па Хаӆэват Пелак шимӆаӊ мир хоятат Ассоциация туӆ. Президент Российской Федерации Совет хоща ӆоӊам хоятат ун па воӆаӊ рупата верӆат, ӆув мирӆаӆ сайӆаман тайӆаӆӆаӆ. Щи веран энамты няврэмат рупата щиран верытӆат еӆӆы утаӆтыты, касӆыман, муй ай куртатан уӆты мохет ант ёрамаӆайт, нётӆайт. Еша уӆты шимӆаӊ мир хоятат ураӊан яӆпа ханшам Концепция 2036-мет таӆ унты ӆэщатӆа. Шимӆаӊ мир хоятат уйт ӆор тыӆащан постаты емаӊ хатӆэӆ Россия ӆоватан постаты питӆа.
«35-мет таӆ муӊ ияха постаӆэв. Кашӊ мир онтасан Овс мув, Щёпр па Хаӆэват Пелак шимӆаӊ хоятат ант ёрэмасайт. Шеӊк ун рупата хув тэӆан уӆты вотам икет версат па тамхатӆ унты нётӆат. Ӆув аратаӆ лакки уӆам мират ияха акатсаӆӆаӆ. Щишан, муӊ йи хоттэӆ хоятат иты уӆӆув, кутӆуван нётасӆув. Муӊ ищиты еӆӆы манты питӆув, рупитты, йис уӆапсайӆув шавиты», — Григорий Ледков ястас.
Аратаӆ ёхтыӆыйм хоятат араӊ ӆуӊтап ёша мощатсат, хота кашӊ мир Воӆаӊ Ляль порайн арыйм арат толмащам вера юр па щём понас. 45 ясаӊан рахаӆ кашӊ ар арэмиты. «День Победы» туп ӆапатъяӊ пуш толмащса.
Ассоциация X Съезд порайн потарса, муй хорпи воӆаӊ рупата няӆ таӆ сыс верман уса. Мет такан рупитам хоятат мойӆаптасайт, ишаксайт. Ассоциация яӆап куща пирыса, РФ сенатор А.В. Новьюхов рупатайӆ еӆӆы туӆӆы.
Етнайн Югра, Якутия, Чукотка, Магаданской область, Ямало-Ненецкой автономной округ па Тува эӆты ёхтам якаӊ, араӊ ёхат каш версат.
Аллина Яковлева ханшам потар
Авторы
Лух Авт
Темы