Лух Авт
Шимӆаӊ мир хоятат емаӊ хатӆ
Ун кер тыӆащ хольмаӊмет хатаӆан Хон мувеван уӆты шимӆаӊ мир хоятат емаӊ хатаӆан юкантсайт. Ин там хатӆ постаман ун вошатан па ай куртатан каш туты харат ӆарпитсайт.
Хащам щутщаты хатӆатан, Канащ похаӆан, тэӆыя арсыр мир хоятат яха актащсат. Хар тахайн омпсам карты куратан хуӆ па щанька шарытса, хуӆ па нёхи ӆантаӊ путат кавартсайт. Тэӆаӊ пасанат омассайт, тынасты харат ӆарпитсайт, ур хотат ӆыпия рахас ӆоӊтыты па пормас верантты утаӆтыты. Няврэмат ёнтман хухатӆысат, айӆат ёх па касты харатан юрӆаӆ этаӆтасат. Шимӆаӊ мир хоятат ӆув ӆумтам сохӆаӆ альсат, пасан тэӆ ӆэтотӆаӆан емаӊ хатӆа ёхтам хоятат ӆапатсат. Кашӊ рут мир ӆув арӆаӆ арысат па яксат. Юхат, ёш яха катаӆман, хатӆ манты щиран ӆарысат.
Каш альты нораман, мойӊ па куртаӊ мохет ещаӆт, куща ёх мойӆапса ясаӊ ястасат. Касапсаятан нох питам хоятат мойӆаптасат.
Паварт хот ӆыпийн ханты ясаӊ утаӆтаты ёнтты мутра этаӆтаса. Муй щиран ясаӊ ант уйтты хоята моштаты, маты ясаӊ муй щиран ястаты па оша пайтты, муй от эӆты потар манаӆ, щит эӆты потар туса.
Щи тумпийн, яӆпа этам ӆуӊатты нэпек «Ямальские лица Победы» хоятата альса. Воӆаӊ Ляль порайн лялясам па рупитам хоятат нэмӆаӆ тохи ханшман уӆӆат. Каматса ханты хоятэв эӆты потар щита па манаӆ. Ӆуӊатты нэпекев ашкуӆайн утаӆтыты няврэмат кеша ӆэщатман уӆ. Щит ураӊан книгайӆ анта шеӊк ун па ӆуӊатты кен. Уйтантопса етшаты еӆпийн, вет ой тайты хоят, яӆпа этам нэпекан мойӆаптасайт.
Ун кер тыӆащ хольмаӊмет хатаӆан Пулӊават вош харатан тамащ емаӊ хатӆ па ус. Рупитты ӆапат етшаты еӆпийн, хоятат каш вантсат, шушиӆысат, рутӆаӆ пиӆан уйтантысат, щутщасат.
Сыстам турам иӆпийн, арсыр рут мир хоятат кутӆаӆан, яма ат уӆӆат. Мувев ит, Турмев па! Рут мир хоятат няврэмӆаӆ, хиӆыӆаӆ энмаӆман еӆӆы ат уӆӆат, рут ясӊеӆ, уӆапсаеӆ шавиман еӆӆы ат туӆэӆ!
Зоя Куртямова ханшам потар
Авторы
Лух Авт
Темы