Лух Авт
Шимӆаӊ рут мир ясӊата утаӆтыты ёх уйтантысат
Ёмвош округ Сургут вошн щимащ хар няӆмет пуш ӆэщатса. Хон мувев ӆоватан няӆмет Всероссийской съезд хоща рут ясӊа па литературая няврэмат утаӆтыты шимӆаӊ мир мохет Овс мув, Щёпар па Хаӆэват Пелак эӆты яха ёхтыӆысат. Щи съезд курк тыӆась 24 па 25-мет хатӆатн верыӆыса, нэман Мир ӆоватн уӆты рут ясӊат емаӊ хатӆ кеша. Аратаӆан щита ияха актащсат ветсот моӆтас хоят 28 регион эӆты, хота шимӆаӊ рут мир хоятӆув уӆӆат.
Там уйтантопса хар Овс мув шимӆаӊ рут мир, Щёпар па Хаӆэват Пелак хон мувев Ассоциация ӆэщатсаӆӆы. Ӆувеӆ Ёмвош округ Правительство, шимӆаӊ рут мир ясӊат па литература утаӆтыты ёх Овс мув, Щёпар па Хаӆэват Пелак Ассоциация, общественная организация «Спасение Югры» па Сургутский государственный университет нётсат.
Щимащ уйтантыты хар нэман верса няврэмат па энамты ёх утаӆтыты хоятат кеша. Щи щирн ӆув потарсат муй мосаӆ яма па туӊа-щира ӆэщатты шимӆаӊ рут мир ясӊат Россия хон мувев ӆоватан яма утаӆтаты ураӊна. Няврэмат утаӆтыты ёх альсат па этаӆтысат хоты ӆув ин шоши ясаӊӆаӆ энамты няврэмат пиӆан утаӆтаӆат. Хоӆна потарса муй арат па хота утаӆтыты ёх ант тармаӆ. Щаӆта потарсат йиты ох утаӆтыты хоятат кеша нохшак эӆатты мосаӆ.
– Там уйтантыты лотн утаӆтыты хоятӆув альӆат хоты ӆув няврэмат пиӆн рупитӆат, кимет хоятат па хуӆантӆат муй хоты рахӆ ямашак па туӊа-щира утаӆтыты щир верты, — Ёмвош округ Овс мув шимӆаӊ рут мир хоятат туты нэ (Уполномоченный) Людмила Алфёрова ястаӆ. — Щи вещкат рупитты щират ияха акатӆаят па еӆӆы китты номас понӆа, щи тахаята, хота шимӆаӊ рут мир ясӊат воӆӆы ёрэматы питсаят. Щиты нумасӆув па шимӆаӊ рут ясӊата онтас верты.
Муӊ Ямал мувев эӆты тохи няӆ хоят яӊхсат: Клавдия Александровна Слепа (главный специалист департамента образования ЯНАО), Светлана Ивановна Тусида (главный специалист департамента по делам КМНС ЯНАО), Меретя Григорьевна Тусида (ур ясаӊ утаӆтыты нэ Сеяха ашкуӆа эӆты) па Антон Эдуардович Максаров (ханты ясаӊ утаӆтыты ху Горки вош эӆты).
– Оӆаӊ хатаӆн муӊ экскурсияя Сургут вош хуват тутӆысаюв, потарса муй хоты тата уӆапса манты питас, хоты вош энамты питас, — Антон Максаров ястаӆ. — Кимет хатаӆн Сургутской университет хоща муӊ рупатаев манты питас. Щита кашӊ регион эӆты ёхтам хоятат докладат альсат па мастер-классат этаӆтысат. Ма щита доклад пиӆна па ӆойӆысам, потарсам хоты муӊ Ӆорвош районэвн ханты ясӊев утаӆтыӆэв па еӆӆы туӆэв.
Иван Сандрин ханшам потар
Авторы
Лух Авт
Темы