обновлено: 09:35, 17 июня 2024
Лух Авт
Шоши мир ёх пормасат мира этаӆтыӆат
Там ӆапатан 21-23-мет хатӆатан Сургут вошан шоши мир ёх пормасат мира этаӆтыты XII Международной фестиваль «Югра» манаӆ. Хоттэӆ таӆан, тамащ вантопсайт па касапсайт шеңк ванан тайты питсайт.
Кашң регион антом туп емаң тахайт, щи тумпийн щита уӆты хоятӆаӆ шавиман тайӆаӆӆы. Мет шопаң, хой хув тэӆан шошия уӆ. Сургут вошан тампуш тус ёшаң хоятӆув, учёной мир, хор ханшты ёхӆув, шоши мир ёх утаӆтыты па ӆэрапман тайты хоятӆув па щитӆув, хой шоши мир ёх уӆапса еӆӆы туӆ па мира этаӆтаӆ — актащӆат.
Россия тумпийн там воӆаң тахая мойң хоятат Китай, Турция, Казахстан, Узбекистан, Сербия, Беларусь эӆты ёхатӆат. «Старый Сургут» историко-культурной центр хоща мет ямшак пормасат ёхатты хоятат кащаӆаӆат. Хутхощъяң номинация щиран касӆат, научно-практической-конференцияйт манӆат. Пормасат юх ӆэр, тонты эӆты верӆайт, ёнтам ӆуматты сохат мира алиӆыӆайт.
Ямал мув эӆты хуӆам хоят там емаң хатӆа манаӆ. Щит Роза Тимофеевна Накова, Егор Егорович Наков па Сергей Валерьевич Аляба. Шеңк ям, хун ханты мир эӆты там хоятӆув потарӆат па йис уӆапса щирэв альӆат.
«Там еӆпи таӆатан тамащ уйтантопсая ма ищи яңхиӆысам. Муң хошты верӆув мира этаӆтыӆӆув, па па мир хоятат пиӆан уйтантытэвна ищи утаӆтыӆув. Вантӆув па артаӆаӆув, мосаң моӆты пормас па ямашак па тусшака верты рахаӆ. Щи еӆпийн ма тонты эӆты онтап верыӆысам, потарсам, хоты сахат тонты акатӆа, ӆэщатӆа, онтпа верӆа па ханшийн щурытӆа.
Ин па, ханты, ур аканят патан туӆам. Щаӆта 50 сантиметра паӆат аканем ханты сохан ӆуматтаӆэм. Ёхатты хоятата мастер-класс альӆам. Ийикем, Егор Наков, там уйтантопсайн ханты мир анат-сунат этаӆтаӆ. Ванты, ӆув хуванат, ӆыйт вераӆ. Нёхартаӆ тумпийн хонна ханшийн эватӆаӆӆы, щуратӆаӆӆы. Уӆтыйн, антом туп йи хуван уӆӆыйӆ, ӆув тумпеӆан хонна хут ай хуван. Пасан сура омастыйн — кашң хоят па атэӆ ан тайӆ», — Роза Тимофеевна там уйтантопса эӆты потартас.
Ма щирэман, тамащ уйтантопсайт, куш хота ӆуӆн ант ат уӆӆысат, иса яңхиӆыты мосаӆ. Щи веран ханты мир уӆапсаев уйтӆа, умащӆыӆа па ванан тайӆа.
Аллина Тоярова ханшам потар
