Лух Авт
Шоши мир ёх студентат ураңан верты нётапсайт
Хасям таӆатан округеван шоши мир ёх энамты няврэмата, хой колледжатан па университетатан утаӆтыйӆ нётӆайт, яӆап нётапсайт ӆэсятӆайт. Няврэмат, хой яртъяң, ихосьяң класс етшаптасат, аттестат хося баллан ант тарапсайт, средний профессиональной образований шитты ураңан, хота ох сохаптаты мосаӆ, образовательной сертификат шитты верытӆат. Унт ӆор тыӆась хусмет хатӆ унты ЯНАО департамент образования конкурсной комиссияя заявление нэпек китты мосаӆ. Йи таӆа нийӆъяң пеӆа вет симась сертификат маӆа.
Колледж етшаты няврэмат, хой «5» па «4» пос тайӆат па внебюджетной организацияята (ТЭК, хот омасты па социальной сфера па па отата) рупитты манӆат, рупитты питты тахайн служба занятости хота яңхты. Сита нэпекат ӆэсятты па хуӆам таӆ сыс кашң тыӆась, хот сохаптаты ураңан, хольмаң пеӆа вет сёрс соӆкува ёша паятты.
Шоши мир няврэмӆув, хой 2023-мет таӆ еӆпийн оӆаң высший образованияя заочной сирн утаӆтыты питас. Госаккредитация программа хуват яма утаӆтыйӆ па округева рупитты ёхатаӆ. Сит йи таӆ сыс ветъяң сёрс соӆкувайн сохаптаӆа. Си нётапса ураңан сессия етшаты юпийн, тыӆась сыс КМНС департамента, мосаң па уӆты администрацияя яңхты па ӆэрапты.
Шоши мир ёх округ ашкуӆа етшам па ВУЗатан очной сирн «4» па «5» поса утаӆтыты няврэмат, кашң тыӆась яң сёрс округ губернатор стипендия шитты верытӆат. Си охат шитты ураңан, ай кер тыӆась оӆаңмет хатӆ унты па уйт ӆор тыӆась оӆаңмет хатӆ унты КМНС департамента нэпекат маты мосӆат.
ВУЗатан очной сирн яма утаӆтыты энамты ёх, хой семьяйӆаӆ нушая уӆӆат па хой аңкеӆ-асеӆ тащан яңхаӆ, хоӆна социальной стипендияйн — 4500 сёрс соӆкувайн сохаптаӆайт па утаӆтыты етшаты юпийн, хот сохаптаты охан — хольмаң пеӆа няӆ сёрс соӆкувайн, таӆ йи пуш маӆайт. Нэпекат ай кер тыӆась оӆаңмет хатӆ унты па щёхар тыӆась оӆаңмет хатӆ унты МФЦ хотан, Госуслуги порталан па почта хуват КМНС департамента, мосаң па ОМСУ хося китты рахаӆ.
Альбина Тырлина ханшам потар
Авторы
Лух Авт
Темы