Лух Авт
Шоши мир шимӆаӊ ёх уйтантыйс
Хасям ятан «Ямал — потомкам!» Ассоциация няӆъяӊ пеӆа ветмет таӆаӆ постас. Округ вошат па куртат эӆты делегатат Пулӊават вошан уйтантысат. Хоты шоши мир хоятат уӆапсаеӆ манаӆ, потар тусат. Муй нётапсайт мосӆат, муй верат верман усат, ястасат.
Си тумпийн кашӊ районан, вошан энамты ёх отделенияйт пуншман уӆӆат. Тохи ӆоӊам айӆат ёх утаӆтыты па рупитты шоши мир энамты хоятат пиӆан рупитӆат. Яха ёхтыӆымеӆ порайн, муй хорпи рупата уӆты тахаятан верӆат, потартсат.
Ӆапатнаӊк вошан рупитты нэ
Си хатаӆан хуӆам хоят «Ямал — потомкам!» Ассоциация округ правленияя пирыса. Ӆув кутэӆан йи ханты нэ ус. Сит Анна Николаевна Сотруева, Ӆапатнаӊк вош эӆты. Рупатаеӆ эӆты каматса ясаӊ ястас: «Ма Ӆапатнаӊкан дополнительной образование утаӆтаты хоята уӆӆам. Горка вошан энапсам. Асем хуӆ веӆман ус, ай пора эӆты ӆувеӆа нётсув. Рупатаем тумпийн, Ӆапатнаӊк вош энамты ёх отделение кусяя уӆӆам. Хоӆна Общественной палата хося ӆоӊман уӆӆам.
Хун колледжан утаӆтысам, 2007-мет таӆ эӆты Ассоциация энамты ёх отделенияя яӊхты питсам. Хун Ӆапатнаӊка рупитты ёхатсам, рупатаем еӆӆы тусэм. Кат таӆ куся нэӊа уӆӆам. Рупатаем сирн муӊ многопрофильной колледжан, Ӆапатнаӊк училищайн утаӆтыты няврэмат пиӆан рупитӆув. Вошеван па округ хуват манты уйтантопсаята, фестивалята па па тахаята яха яӊхӆув, вантӆув, потарӆув, утаӆтыӆув, касӆув.
Ӆапатнаӊк вошан хасям яӊ таӆ многоборье касапсайт ант верыӆысайт. Хасям таӆан муӊ энамты няврэмат кутан си касапса версув. Там пуш кат ятан ӆэсятӆаӆӆув. Ин ӆув ант еӆамтыман, ар хорпи касапсаята ханшӆтантыӆат, касӆат. Ӆапатнаӊк нэпек ӆуӊатты хот пиӆан рупатаев шеӊк яма манаӆ. Сита диктант рут ясаӊан ханшӆув, уйтантапсайт верӆув. Вошеван манты емаӊ хатӆата энамты ёх хоттэӆат, рупитты атэӆ хоятат касты вохӆаӆӆув, яха ӆэсятыӆув.
Еӆӆы пеӆа рупатаем энамты ёх пиӆан туты питӆэм. Хоӆна утсиӆам, вошат па куртат отделенияйт кутан рупатаев яха верты, яха уйтантыты».
Хоятат пеӆа шеӊк самаӊ
Ноябрьск «Ямал — потомкам!» Ассоциация отделение эӆты няӆ хоят ёхтыӆыйс. Сита кусяя Александр Дмитриевич Нахрачёв уӆ. Каматса ясаӊ ястас: «Ма Касам-Нёӆ курт эӆты. Ноябрьск вошан уӆӆам. Ассоциацияйн ветмет таӆ рупитӆам. Рупитты сысэв няӆ таӆ. Хасям таӆан еӆӆы пирысайм.
Сергей Афанасьевич Молданов пенсияя манмаӆ порайн, ма понтсайм. Вошеван антом шеӊк ар шоши мир хоят уӆ, катсот ветъяӊкем. Ма ӆувиӆаӆ хоӆ ханшсаӆӆам. Вошеван ханты аршак уӆ.
Шоши мир шимӆаӊ ёх емаӊ хатӆатан уйтантыӆув. Вуӆы ёх емаӊ хатӆа постам «Авка» уйтантопса ин вошеван верты питса. Сита хоятӆув вуӆы ухаӆан навраӆтыӆат, северной многоборье сирн касӆат. «Нум» этнографической комплекс пуншса. Муӊ хоятӆув па сита рупитӆат, яха рупатаев туӆэв.
Хоятат ар пелак рупата, хот сирн ёхтыӆыӆат. Хасям таӆ эӆты шоши мир хоятат садика яӊхты няврэмӆаӆ ураӊан ох ант сохаптаӆат. Вош администрация пиӆан симась нётапса ӆэсятсув. Ашкуӆа ураӊан па муӊ справкайн мийӆыӆӆув».
Ӆорвош район рупата
Светлана Владимировна Пырысева Ӆорвош район энамты ёх пиӆан оӆаӊ таӆ рупитаӆ. Хоты рупатаеӆ манаӆ, потартас: «Ван хатӆап тыӆасян таӆа йиӆ, хоты ма «Ямал — потомкам!» Ассоциацияйн рупитӆам. Хун хоятат пирыӆайт, район хуват правленияя ӆоӊам, уна ювам хоятат яха уйтантыӆат. Район энамты ёх отделение пиӆан ветъяӊ моӆтас хоят.
Симась тахайн ма оӆаӊ пуш. Мохты отчётно-выборной собранияя ликамсам. Сита муӊ яӆап куся нэ пирысув. Ин Валерия Гутман округ правленияйн рупитты питаӆ.
Районэван ар хорпи уйтантопсаятан, фестивалятан, конкурсатан касӆув. СВО хося уӆты хоятӆува нётӆув. Студентат пиӆан рупитӆув. Муй хорпи инсясапсайт тайӆат, моӆты ки нётапса мосаӆ, нётӆаӆӆув. Товийн няврэмата, хойтат Пулӊават вош колледжан утаӆтыты етшасат, рупатая вуты ураӊан, резюме ханшсув. Хоя нётсув, хоӆ вусайт. Сусан районэв эӆты ар няврэм утаӆтыты манас, муй хорпи нётапсайт уӆӆат, ястасув. Ёхӆы охӆаӆ сохаптаты ураӊан нэпекат ӆэсятсув.
Еӆӆы пеӆа, ма пиӆэман рупитты хоятӆам пирыты утсиӆам. Ин муӊ ар хоят уӆӆув, онтас шимаӆ. Мужи вошан туп нийӆ хоят. Шимаӆ хоят ат уӆ, рупатаев яма верӆэв».
Альбина Тырлина ханшам потар
Авторы
Лух Авт
Темы