Лух Авт
Сорнеӊ ёшаӊ ханты леккар
Леонид Гаврилович Куртямов Ӆорвош районэвн, Ямал мувевн па Хон мувев ӆоватан яма уйтӆа. Ӆув уӆтаӆ хуват хоятат яммаӆман леккара рупитас. Тамхатӆ, 29-мет хатаӆн ун кер тыӆащн, сэма питам хатӆаӆ постаӆ. Ӆув 75-мет таӆа щи ванамас.
Хорамаӊ па щуняӊ Щаня мувн сэма питас. Ащеӆ-антеӆ вуӆэӊ тащ хотатн яӊхсаӊан па хуӆ веӆман рупитсаӊан. Хун Леонид Гаврилович ашкуӆа етшаптас, нумасты питас: хоӆта манты, рупитты, мосаӊ еӆӆы утаӆтыты. Щикуш ащеӆан ёхи хащты, вуӆэт пиӆан рупитты, партыӆыса. Ӆув па кимет ям номас поныӆыйс: «Антем па ащем ая ант йиӆат, пирщаматы питсайт. Щиты леккара утаӆтыты манты номас понтсам».
– Ашкуӆа етшам юпина, муӊ ӆухасӆув пиӆна, Тюмень воша мантсув. Мет оӆӊа нумассам, мосаӊ няврэмат касты утаӆтаты хоята манты, мосаӊ мув ӆыпи вантты хоята па геолога питты. Антиӆам нумаӆмасӆам па так номас понтсам, леккара еӆӆы утаӆтыты манты. Щи порана муӊ шоши ханты хоятӆув кутн шеӊк ар леккар антом ус, — Леонид Гаврилович ястас. — Утаӆтыты етшасам па мохты ёхи йисам. Мет оӆаӊн кат таӆ хоят ӆов муш яммаӆман рупитсам. Щи порана Ямал мувев ӆоватн артан яӆап вошат па куртат омпсантты питсайт. Ар тахаят эӆты арсыр рут хоятат хотат верты ёхатсат. Рупитман, хоятат хой порайн, мушмаӆтысат. Атаӊ-хатӆ мушаӊ хоятат хоща па леккарат пиӆн яӊхсув. Ӆувиӆаӆ тумтака павтыӆысӆув. Мет ӆавартаӊ кашаӊ хоятат Пулӊавта тутӆысайт. Щита муӊ ун операцияйт версув.
Хун ёш па кур ӆов шука тохӆ — щит мет ӆаварт туӊа-щира паватты па яммаӆты. Щишн, ӆув яӆап щират каншты питас, хоты сорашак мушмаӆтам ӆовт ияха акатты па ханаӆты. Мир ӆоватан уйтты ун леккар, Илизаров нэмпи карты ющатн, шукаӆам ӆовт ияха пуватты питас. Щимащ мутра пиӆан хоят кур-ёш ӆов тайт сорашак тумтака йиӆат. Ёвра энмам ӆовт щи мутрайн туӊа-щира ияха рахты па аймтаты рахаӆ.
– Кашӊ хоята ӆув рупатайӆ туӊа-щира уйтты мосаӆ. Щи порайн рупатаен яма манаӆ. Леккар рупата хоща кашӆы па вевтама рупитты воӆӆы ант рахаӆ. Ма рупатаем хуват арсыр мувата утаӆтыты яӊхсам. Кашӊ таӆ, ивевн, хоят яммаӆты яӆап щир этаӆ, щит иса уйтман па нумман тайты мосаӆ, — Леонид Куртямов нумасман потараӆ. — Ин па камн хорпи мутрайт, компьютерат нётӆат хоятат тумтака паватты. Веӆщи рупитты ай леккарата ищи нётты мосаӆ. Рупатаеӆ верман эӆты вантман альты мосаӆ. Хота ям ясаӊан, хота вер этаӆтаман мосаӆ энамты ёха нётты. Щиты ӆув утаӆӆат па самаӊа еӆӆы рупитты питӆат.
Леонид Гаврилович рупитмаӆ хуват ар хоят тумтака павтас. Вет щёрскем операция верас. Няӆъяӊ таӆ Пулӊават ун леккар хотан рупитас. Тэӆыя пумащипа ясаӊ леккарэв кеша, ханшман уӆӆа.
Леонид Куртямов — «Отличник санитарной обороны», «Заслуженный врач Российской Федерации» па «Почётный гражданин ЯНАО» нэмат тайӆ. Ӆув ӆохан ай пора эӆты хоӆна хухатӆыйӆ, ухаӆ шоппи наварты хошаӆ. Щи тумпина греко-римской па вольной пертащты щирн Тюменской область ӆоватн арпуш мойӆапсайт шитыӆыйс. Ямал мув ӆоватан Овс мув шимӆаӊ рут мир касапсайн ищи оӆаӊ местайт вуйӆыйс. Щи ураӊна ӆув Олимпийской касты вер хоща «Сочи-2014» ущитам тут няӆам туты пирыса.
Ин ӆув пенсияйн уӆ па аӆ щиты ант омасаӆ. Энамты леккарата пора-порайн нётаӆ хота ясаӊан, хота веран. Кашӊ ӆапат ӆохн хухатӆыйӆ па касты ӆойӆыйӆ. Энмам куртаӆа яӊхиӆыйӆ. Хуӆ па вой веӆты яӊхаӆ.
Ар яма рупитам ураӊна па сэма питам 75-таӆ кеша Ямал мувев кущайт эӆты мойӆап ясаӊан китӆа. Еӆӆы ӆувеӆ тумтака уӆты па ям верат еӆӆы туты. Щимащ умащ шоши хоятат онтасан муӊ ханты мирэв хувтан мир ӆоватан уйтӆа!
Иван Сандрин ханшам потар
Авторы
Лух Авт
Темы