Лух Авт
«Сорни-Най» йис потрэв хуват опера ар тыйс
Йис тэӆн хантэт па охалят йис потрат тайсат, щит эӆты оша йис, муй щирн Туром, Мувев-Йиӊкев, Най-Уртат, хатнэху, войт па па отат тыйсат. Сорни-Най эӆты йис потар кашӊ шоши хоят уйтаӆ. Там ванан «Сорни-Най» нэмпи опера ар тыйс.
Щи опера ар ханшты вер эӆты муӊева Югра мувев опера арат арыты нэ Софья Алек-сеевна Шесталова айкеӆ тус:
– Щит эӆты мин икем, охаль мир оӆаӊмет композитор ху Владимир Иванович Шесталов пиӆн хувн нумассамн. 2012-мет таӆн ӆув «Овс мув ар сов» нэмпи араӊ щуӊк дискаӆ эсаӆсаӆы. Щита Югра мувев духовой оркестр ёх (дирижёр ху Антон Яковлев ус) арсыр нарасъюхатн В.И. Шесталовн ханшам ар соват нарассат, щи тумпийн щита шоши мир нарасъюх па торсапӆ ханащсаӊан. Ма ёӆн щи диск яма хуӆантмемн роман Владимир икема ястасам: «Володя, щи ар совӆан шеӊк хорамаӊат, щишн арыты ӆаӊхаӆайм. Там ар совӆан хуват опера ар ханшӆамн!» Ӆув кашащас, туп така партас, щи опера ар туп манэма арыты мосӆ!
Софья Шесталова ясӊаӆ щирн, щи эӆты айкеӆат акатты ху Виктор Журавлёв «Тюменские известия» газетайн 23.11.2012-мет таӆн ханшас. Щи айкеӆ эӆты С.А. Шесталова ӆуӊатӆ:
– Владимир Иванович Шесталов ястаӆ: «Ма — охаль мир композитор ху, щишн шоши мир йис потар эӆты опера ар ханшты вутщиӆам. Мосаӊ, еӆӆы ма ханшам симфонической ар совӆам хуват «Сорни-Най» нэмпи опера ар тыйӆ. Ин итухӆ арат имем Софья Алексеевна утаӆтаӆ, ӆув, ванты, драматической сопрано турсый тайӆ».
Софья Алексеевна ястаӆ, «Сорни-Най» опера ар — щит Шесталов рут и номас эӆты тыйм ар. Мет оӆаӊан охаль мир писатель ху Юван Николаевич Шесталов 1976-мет таӆн «Сорни-Най ханя» нэмпи потраӆ ханшсаӆы, 2005-мет таӆн Владимир Шесталов, ӆув похӆ, охаль мир оӆаӊмет композитор ху, «Сорни-Най» сюита ар совӆ ханшсаӆы. 2013-мет таӆн В.И. Шесталовн ханшам «Музыка и мифология Медвежьего праздника обских угров» киникайн Сорни-Най эӆты ар ханшман ус, щит Софья Шесталова ханшас. Щиты айӆтыена шоши мир йис потар эӆты опера ар тыйты питас. 2011-мет таӆн Юван Шесталов антома йис, 2014-мет таӆн ӆув похӆ Владимир хув паната шушмас, щишн щи рупата воӆыйс. Ванты, опера ар ханшты вер — щит ун па ӆаварт рупата, щит, матты ки, ар сов потар.
– Опера ар — щит ипуляӊ нарасты, арыты па якты ун потар, щита ищи оӆаӊмет потар, мет воӆаӊ вер па сохантты вер уӆӆыӆат, — Софья Шесталова ястас.
Туп ям арат таӆ юпийн Софья Шесталова опера ар еӆӆы ханшты питас, щита Ю.Н. Шесталов ӆуӊтарӆаӆ уӆӆат, щи тумпийн Софья ищи ханшас. Ма С.А. Шесталова эӆты инщассам, муй эӆты «Сорни-Най» опера ар питӆ, ёхӆы ӆув ястас:
– Ма туса щи эӆты нумассам. Опера арн мет сыры увертюра — щит муй эӆты потар. Щаӆта оӆаӊмет ар — щит Мувев сэма питам вер, кимет — Сорни-Най сэма питам вер, хуӆмет — щит Куль Отыр Сорни-Най пиӆн таранӆаӆ, няӆмет — щит Сорни-Най ханя, ветмет — щит Сорни-Най эӆты тыйм йис потар, хутмет ар эӆты ин ан потарӆам, ханяя тайты питӆэм. Уйт ӆор тыӆащ 8-мет хатаӆан опера ар ханшты верэм сохнас.
Интам «Сорни-Най» опера ар арыты порайн етнхот альты вер эӆты нумасӆам. Щи верн манэма «Хатӆ» нэмпи ханты-охаль мирӊан театр артистат, «Ёмвош ёх» тахайн арыты нэӊат па «Монщ хот» арыты-якты няврэмат нётӆат.
Там опера 35-кем минута арат щащты питӆ. Софья Шесталова ясӊаӆ щирн, щи операйн арсыр европейской нарасъюхат эӆты шоши мир нарасъюх, торсапӆ, хутаӊъюх па пенщар щащты питӆат. Мосаӊ, еӆӆы щи опера ар охаль ясӊа тоӆмащты нётӆа. Софья Алексеевна Шесталова — творческой хатнэху, щишн хонна ант ястас, хун ӆув «Сорни-Най» опера арыты питӆ, туп щи альты вер там таӆн тыйӆ. Муӊ ӆувеӆа ар ям ясаӊ ястаӆув, ӆуӆн ар хоят «Сорни-Най» опера самаӊа ат хуӆантсат!
Людмила Шульгина ханшам потар
Авторы
Лух Авт
Темы