Лух Авт
Суюв омасты емаӊ хатаӆан сэма питмаӆ
Тампуш Зоя Ивановна Куртямова 80-мет таӆ ӆовата йис. Ас нопатты тыӆащ 15-мет хатаӆан сэма питам хатӆаӆ постас. Щиты нэпекӆад хоща ханшман уӆ. Туӊа-щира ки, Ас нопатты 6-мет хатаӆан ӆув сэма питас. Щи порайн Егор хатӆ па суюв омасты хатӆат постаӆайт.
Аншикурт — щиты ханшман уӆ, ӆув сэма питам нэпекаӆ хоща. Ӆув хоттэӆ хоятӆаӆ па опращӆаӆ щита ант усат. Сэма питты порайн, ӆув щи курт пуӊаӆ эӆты касаӆты юшеӆ уӆмаӆ. Щишан щиты нэпека ханшӆа.
– Ма сэма питсам, хун вуӆы тащ артан суюв омасты питас. Ащем, Иван Павлович Сандрин, шеӊк нох амтас, хоты ай суюват кутан ай эвие там мува ёхтас. Таӊха, Нярас ёх ӆуӊхатан, щиты партса, — ястаӆ Зоя Ивановна. — Ӆув Вуювкуртаӊ ху. Щит Мужи вош эӆты антом шеӊк хув, Катра Кев Авт Ас па пелакан посӆатан омасты куртые. Ащем вуӆэӊ тащ хоща кущая рупитас. Щишна ӆув хоятатан Куща Ванькая айӆса. Хоят пеӆа ям па потраӊ ус. Ма няӆӆэм таӆ ӆоватан уӆмеман, ӆув роман антома йис. Щикем щаль…
Антеӆ, Мария Ивановна Сандрина, туса ёнтасты па каркам нэ Хон рут эӆты уӆмаӆ. Ӆув ийикеӆ пиӆан няӆ няврэм сэма паватсаӊан: Роман, Екатерина, Зоя па Федосья. Ийикеӆ роман антома йис, щиты щи няврэмӆаӆ энмаӆсаӆӆы. Няврэмӆаӆ ун ащи — Павел Данилович па ун анти — Мария Васильевна (эви опращ нэмаӆ Шонь, мосаӊ Шон), шеӊк такан нётсаӊан.
Воӆаӊ Ляль етшам юпийн кашаӊ хоятата яма рупитты мосмаӆ. Щиты, Зоя Мужи вош ашкуӆа 7-мет класс етшам юпийн, мохты ёхи манас. Вуюкуртан усат. Щиӆта Яӆап Кев Авт курт унты яӊкем километра. Тохи, ӆув актам вонщапсайт па веӆам хуӆат, хопан ӆовӆасман тутӆысат. Ёхӆы па ӆэтот пиӆан ёхтыӆысат. Юхат па Катра Кев Авт курта касаӆсат па щита яӆап хот омассат. Зоя ун ащеӆа павартат кар эӆты сыстампты па нох таӆты нётас.
Хус таӆ ӆоватан, Зоя Ивановна ху сая манас па Мужи воша касаӆсаӊан. Антеӆ па ун ащеӆ патан вустан. Щи унты ун антеӆ антома ювмаӆ.
Ийикеӆ, Владимир Александрович Ребась, вуӆы леккара рупитас. Катӊан, няврэмаӆаӆ пиӆан вуӆы хотан яӊхсатан. Хуӆам няврэм сэма питас: Алла, Евгений па Александра. Няврэмӆаӆ ай уӆмеӆан, ийикеӆ роман антома йис, паратса. Щиты ӆув утща ӆувиӆаӆ энмаӆты питсаӆӆы.
Юхат ӆув Иосиф Никифорович Куртямов пиӆан ияха уӆты питӆаӊан па хоӆна ай эвие мощатӆаӊан. Мария нэман нэматӆаӆан. Ай Маша антеӆ па ащеӆ хоттэӆ хоятат ияха акатты питсаӆӆы. Ин ӆув иса уна йисат па пиӆаӊа мойӆаты яӊхиӆыӆат.
Зоя Ивановна уӆтаӆ хуват ар туса ёнтасас. Ӆэщатом отӆаӆ арсыр музеята мийман уӆӆат. Яма рупитам ураӊна район па округ ӆоватан эӆты ишканщап мойӆап нэпекат тайӆ. Сэма питам хатӆаӆ пиӆан! Ат па щиты еӆӆы вещката па тумтака уӆ!
Иван Сандрин ханшам потар
Авторы
Лух Авт
Темы