Лух Авт
СВО хося уӆты хоятӆув нумӆаӆӆув
Кашӊ порайн хун хон мувеван лялят уӆӆыӆысат, хон мув хоятӆув ант нумасман, мувев, хоятӆув шавиты маныӆысат. Ин па, хун Украина муван ляль манаӆ, шоши мир ёх СВО хося манӆат.
Хасям таӆатан кашӊ куртые эӆты ар ханты хоят мобилизация сирн вуйӆыса. Там йисан ар хоят ӆув сираӆан маныӆыйс. Ар ханты пох ёхи ант ёхтас. Там мосванан атом айкеӆан ёхатсаюв, Станислав Анатольевич Тояров антома йис.
Ӆув Ӆорвош район Ӆоркуртан энмас па утаӆтыйс. Хасям таӆатан семьяйӆ пиӆан Пулӊават вошан ус. Сиӆта СВО хося манас. Туп кат тыӆась сита ус. Донецкой область Архангельское куртан уӆты хоятат ӆыӆ сайӆаман, антома йис. Ас потты тыӆасян катхосьяӊмет хатаӆан Пулӊават вошан Аллея Славы харан лоттаса.
Станислав Анатольевич пиӆан ма йи классан утаӆтысам, аӊкеӆ — Тамара Гавриловна, опеӆ — Светлана Анатольевна, ийимеӆ — Анастасия Ивановна уятӆаӆӆам, йи куртан усув.
Классэван няӆхосьяӊ хоят утаӆтыйс. Кашӊ порайн классной утаӆтыты хоятӆув пелтасисат. Ӆапат пох ус, ар пелак ант хуӆатсат, кутармасат, ёхӆы хэсьсат. Сишан утаӆтыты хоятӆув муӊев утаӆтаты ант ӆаӊхасайт. Туп кат пох ром усӊан. Сит Александр Яркин па Станислав Тояров. Симась ром, самаӊ, вещкат хоят ус. Аӊкеӆа нётас, опеӆ шавиман тайсаӆӆы.
Йи пуш опеӆ омлэп эӆты ким таӆсаӆӆы. Опеӆ нумаӆмийс: «Катра порайн йиӊк омлэп эӆты ӆован тутӆыса. Няврэмат йиӊк тутӆыты хоят юпийн хухатӆысат па ай ухаӆ пущкайӊ ухаӆ хося ярыӆысат. Имоӆтыйн ма Стас пиӆан ухӆэман ярсэман па омлэп унты хатэмисман. Каматса ухаӆ ярман ус. Ма ёӆта, ухаӆан омассам. Хун ӆоваӆ нёхӆас, ай ухӆэв омлэпа хатэмас, йиӊка питсам па уваӆсам. Апсем хун шияӆас, шеӊк паӆтамас па увты питас. Йиӊк туты хоятан ким таӆсайм, Стасан нётсайм. Симась вер ус». Си пора эӆты опеӆ вантман, шавиман тайсаӆӆы.
Станислав Анатольевич Валентин Вальгамов пиӆан ӆухсаӊа усӊан. Ӆув па каматса ясаӊ ястас: «Ӆухсэм хут таӆ кем уятӆэм. Шитамкурта хоят нётты каншсам. Стасик телефон номеран масайм. Си пора эӆты уятӆэм. Хун мосас, ӆувеӆа нётсэм. Хун ма вохӆэм, ӆув ёхтыӆыйс. Кат таӆ сыс мин Ӆуӊ кутоп хатӆ, Ворӊа хатӆ ӆэсятсаман. Хун кум тайс, уӆты муваӆа яӊхас. Ай хопат верас. Хиӆыӆаӆа нётас. Волонтёра ус. Хоятат пеӆа ям ус».
Кашӊ хоятӆува, хой асеӆ, яйӆ, ийикеӆ ин ляль харан уӆ, ун пумасипа ястаӆув, тураман ат шавиӆайт. Ӆув муӊ уӆапсаев шавиӆат, хоятӆув ляльӆы, яма уӆты ураӊан, лялясӆат. Ӆув мет юраӊат, паӆтап ант тайты похат. Муӊ шимӆаӊ мир ёх, хун мосаӆ, муӊ мет оӆаӊ тахайн.
Станислав Анатольевич па па похат, хой ёхи ляль эӆты ант ёхатсат, нумты питӆаӆӆув. Рутӆаӆа пумасипа ясаӊ ястаӆув, ханты мир хося нэмӆаӆ хасьӆат.
Альбина Тырлина ханшам потар
Авторы
Лух Авт
Темы