Лух Авт
Сыстам йиңк йинщты ураңан
Хащам ятан округ ӆоватан кашң вошан, кашң ай куртан сыстам йиңк кашң хота ёхатты ураңан ар рупата верӆа. Щи веран йиңк сыстапты яӆап пормасат па хотат омасӆайт, тухаӆ тахаятан па уӆам отат туңа щира ӆэщатӆайт.
Йиңк сыстапты тахайт ӆэщатты тумпийн, хонна йиңк манты турат пелатӆайт па яӆпа таӆӆайт. Харңайң турат нох вуӆайт. Ванты ӆув онтасэӆна хотата ищипа хулэң йиңк ёхатаӆ.
Ӆапатнаңкан йиңк сыстапты ун хот омасӆа. Вош опсантам вуш эӆты, мет шопаң товийн, йинщты йиңк иса Харп эӆты тутӆыӆа — щит шеңк щёхласаң вер. Кашң таӆ энамты вош морта йиңкан ант тарамӆа. Щишан номас понтса мира мосты хот омасты.
Ноябрьск вошан мув иӆпи эӆты вуты йиңк сыстапты хар пуншса. Щи веран йинщты па лёхитыты йиңкан тарамты питӆайт. Хоятат хоты йиңк сахат сохаптысат, щи арат еӆӆы сохаптаты питӆат. Яӆпа этам верат онтасан ӆув щеп охеӆ ант шимӆамаӆ.
Ӆоркуртан йиңк сыстапты хар яӆпиӆаса. Сыстам йиңк шавиты хошап кат пуша аршака йис. Хольмаң кубометра эӆты вуйӆыты питӆа па няӆ вет кубометрайң хошапата шошмиӆыты. Йиңк манты туратан кутӆаӆан таӆсайт. Каматса ясаң Анастасия Вениаминовна Рылова (Уксюмова) ястас: «Йиңк сыстапты хар пуншам порайн кеншака йис. Ант паӆман йиңк йинщӆув. Нови сохат кушкепа сыстам йиңкан пусӆаӆӆув. Катсот литра пущкайӆув сахат 15 соӆкува сохаптаӆув. Туп мосаӆ йиңк сыстапты хара манты па щита вохты, ястантыты, хун туты верытӆайты. Аӆ щиты иса ям».
Тамащ мира мосты вер ин аратаӆан округ ӆоватан еӆӆы туты питӆа. Нумастэман, еӆӆы хатӆатан кашң хота йиңк тур хуват ёхтаптаӆа, ант мосты питаӆ таӆан па ӆуңан пущкайт тэкнаптыты.
Аллина Тоярова ханшам потар
Авторы
Лух Авт
Темы