Лух Авт
Таӆ юшат ӆэщатӆайт
Округеван кашӊ таӆ хуӆам региональной па яӊ муниципальной таӆ юшат ӆэщатӆайт. Юшӆаӆ хуватаӆан иуӆты ӆуӊатман йи щёрас хуӆамсот пеӆа нийӆъяӊ километрая хойӆат.
Там ӆэщатты юшат хуват хус ай курта ёхатты рахаӆ, хоӆта тохӆаӊ хоп ант ӆатыӆыйӆ. Кум шитман машинаятан ӆэтотат, пормасат, хот верты павартат, сохӆат, тутъйиӊк, кур аӆты юх, муй иса туӆа.
Хуӆам региональной юш эӆты катн верты питсайӊан. Щит Коротчаево — Красноселькуп па Лабытнанги — Мужи — Азовы — Теги. Рэп ӆоӊӆа нох мантыйн, юшаӆ шомпаӆаӊа шеӊк ант ӆойты ураӊан, соймат хоща еӊкаӆ куӆа потаӆтаман нохшак аӆамӆа. Хуӆмет юшаӆ Аксарка — Салемал — Панаевск — Яр-Сале мет ар ёхан вуншты тахайт тайӆ. Асан еӊкаӆ хоӆна ухаӆ, щит ураӊан хоӆна ӆавӆасӆат.
Пулӊават па Ӆапатнаӊк вошӊан кутан хащам ӆапатан Ас вуншты юш пуншса. Тыеӆ-тохеӆ кат юш хуват ӆавартэӆан 3,5 тонна унты машинайт эсаӆӆайт. Еӊкаӆ куӆашак йиты юпийн, ӆавартшак машинайт веӆщи яӊхты питӆат.
«Муйкем ищкия йиӆ, щитаӆан таӆ кеша ӆэщатты юшӆаӆ сорашак пуншӆайт. Уятӆэв, хоятат ӆавӆасӆат. Туп ант ӆэщатам юш хуват ант мосаӆ манты. Нын ӆыӆӆан нын щи шавиӆӆан. Таӆан, юша актащты еӆпийн, ищи вантман уӆаты. Турам хатӆаӆ муй хорпи. Патн ӆэтот, хошам сох, тутъйиӊк, щераюх, кеӆ, карсар, сопаса понам колесо иса таяты. Шеӊк тарм ищкийн, няӆъяӊ эӆты ищкия ки йиӆ, вотас, потам шув порайн, юшат па лап пентты питӆайт», — округ юш верат туты дирекция ӆаӊкар куща Александр Симонов ястас.
Зоя Куртямова ханшам потар
Авторы
Лух Авт
Темы