Лух Авт
Таӆ сыс уӆам верӆув эӆты
Ханам ёх па ханам нэӊат, вуща уӆаты! Там 2025-мет таӆэв щи етшаӆ, щи веран, уӆам сысэв эӆты потрэв туӆэв. Аратаӆан муӊ нын пиӆанан хутъяӊ пеӆа кат ӆаптэв усэв. Верытмев кеман нын унтан айкеӆат тутӆысув.
Кум шитмеван куртӆан па ноптаӆты панӆан унты ёхтаптысув, нын вещкат потарӆан ханшиӆысув. Моӆты курта ёхатты ант верытмеван, нын муӊев айкеӆ верыӆысты, потрат па хорат китыӆысты. Щи веран, нын ханты мир ураӊан, ищи ун онтас тусты.
Газетайн потрат этӆыты тумпийн муӊ хонна ВКонтакте па Одноклассники хоща поныӆыӆув. Щи понты потарӆув хоща ищи моӆты ясаӊ ханшиӆыяты. Щи порайн туп муӊ артаӆаты верытӆув, муй хорпи айкеӆат нын ӆуӊатты ӆаӊхаӆайты.
Хоты муӊ артаӆасэв, кашӊ хоят аршак ӆуӊатты ӆаӊхаӆ ӆув уйтты хоятаӆ, куш рутаӆ, куш куртаӊ хоятаӆ эӆты. Щи тумпийн ун хоятат эӆты поныӆыты потрат ищи сама рахӆат. Парасковья Ивановна Возелова, ӆув Питӆоран уӆ — ихощъяӊ щёрас хоятан щи потар вантса. Светлана Павловна Кельчина, Ӆорвош эӆты — катхощъяӊ щёрас пуш ӆуӊтыӆыса, Емельян Кириллович Куртямов, Овкуртан уӆ — хуӆамхощъяӊ щёрас моӆтас пуш ӆуӊатса.
Хоятат тумпийн, ай куртат уӆапса, хуӆ веӆпасӆаты па тащан яӊхты ёх верат эӆты, ма нумастэман, нын ищи ӆуӊатты ӆаӊхаӆайты. Шеӊк ӆуӆан ям ус, хун нын там вер щиран муӊев ищи нётсаты. Хор китсаты, айкеӆ версаты, мата хоятэв эӆты ханшты мосаӆ. Папуш муӊ ищиты кашӊ курт унты ёхтаптыӆув, айкеӆ ханшӆув па хор верӆув.
Таӆ сыс муӊ кашӊ пуш ханшиӆысув тащан яӊхты па хуӆ веӆпасӆаты мохиӆув эӆты. Ӆорвош па Кев сыӆ районӆуван интам хатӆатан йис уӆапса туты хоятӆув хонна уӆӆат. Ӆув воӆаӊ верэӆ онтасан муӊ округ экономикаев нох аӆамман тайӆэӆ. Ӆув онтасэӆан муӊ пасанӆува нёхи па хуӆ эӆты верам ӆэтотат питыӆыӆат. Щи тумпийн тата верыӆыты ӆэвпасат па мув суӊата китыӆыӆайт, тыныӆыӆайт.
Вуӆы ёх па хуӆ веӆпасӆаты ёх емаӊ хатӆат эӆты ищи ханшиӆысув. Щи пораятан уйтантыйм хоятӆув ищи ясаӊ верыӆысат, айкеӆат ӆув уӆапсаеӆ эӆты поныӆысув. Щи тумпийн кашӊ пуш ханшиӆыӆув, хота па хун леккар ӆаращ ёша пайтсат, хойтэм чумовой капиталан маса, касӆыты юшӆаӆ мата тахаятан манӆат, искусственной интеллект вуӆэт ураӊан муй ям онтас туӆ.
Айӆат мохиӆув ищи ёрэмаман ант тайӆаӆӆув, икуӆатан ханшӆув, хоӆта ашкуӆа юпийн еӆӆы утаӆтыты манты рахаӆ. Муй хорпи нётопсайт округ ӆоватан рупитӆат. Грант щиран камн соӆкува шитты рахаӆ, субсидияйт муй ураӊан мийӆыӆайт. Уӆты хотӆаӆ ураӊан ох ёхӆы ёхтаптаты верытӆат, стипендия ох камн соӆкувая хойс. Кашӊ ӆапат нын ӆуӊатты верытсаты, мата куртан па вошан яӆап хотат омасӆайт. Хойтат яӆап хотата касӆаптаӆайт.
Ляль харан уӆты хоятӆув муй хорпи яӆап нётопан постасайт, щи тумпийн рутӆаӆ-сырӆаӆ ищи муй ураӊан нётопса вуты верытӆат. Ох шимаӆ ёхтаптаты хоттэӆат ураӊан ищи нётопса верат кашӊ пуш ханшиӆыӆув, ванты ат уйтӆат, муй па хота вохты мосаӆ.
Монщаӊ-араӊ лопасӆув онтасан нын верытсаты сыстам ханты ясаӊ каншты, ант уйтам ясӊат номпса понты. Щи тумпийн етнаятан няврэмӆана па хиӆыӆана ӆуӊатты. Щи веран ӆув уйтты питсат, муй хорпи умащ монщат ханты мир хоща уӆӆат. Хащам хуӆам тыӆащан монщӆув хорамаӊ хоратан поныӆысӆув, нынана умащ ӆуӊатты ураӊан. Папуш эӆты нумасӆув соцсетята поныӆыты монщӆув сыйн понты. Щи порайн нын антом туп ӆуӊатты верытӆаты, щи тумпийн Ас йиӊк иты овты сыстам ханты ясӊев хуӆантты.
Ун пумащипа ястаты вутщиӆам аратаӆ ханты мирэма. Нын онтасанан там верты рупатаев кентат манас. Постыӆыйм верӆув паты унты тусӆув. Там таӆ потар китман шеӊк такан рупитсат: Владимир Егорович Енов, Людмила Тихоновна Гурьева, Любовь Геннадьевна Возелова па Галина Пенчакувна Кечимова. Ӆух Авт газетайн потар ханшман па хор вуйман рупитсат: Зоя Николаевна Куртямова, Вера Алексеевна Лонгортова, Валентина Геннадьевна Рохтымова, Альбина Егоровна Тырлина, Аллина Кирилловна Яковлева. Папуш ищиты такан рупитӆув, мосты айкеӆат каншӆув.
Яӆпа ёхатты таӆэван па уйтантыӆув, потрэмиӆув. Ойӊа-пищаӊа, йисаӊа-нуптаӊа! Няврэмӆан, хиӆыӆан, рутӆан-сырӆан пиӆан тумтака уӆаты! Сора кеша!
Аллина Тоярова ханшам потар
Авторы
Лух Авт
Темы