обновлено: 06:33, 02 октября 2026
Лух Авт
Таӆӆаӆ ара ювам ёх уйтантысат
Хащам ӆапатан Ёмвошан Овс мув шимӆаӊ мир таӆӆаӆ ара ювам хоятат мет оӆаӊ съезда актащисат. Куртат па вошат эӆты 60 делегат ус. Ӆув хоӆ общественной организацияята, каш верты харата ӆоӊман уӆӆат, щи тумпийн энамты няврэмат па усат.
Оӆаӊ хатаӆан потар манас, хоты там йис порайн рут ясаӊ шавиты мосаӆ. Щи веран аратаӆ миран уятты па ванты ураӊан, цифровизация мохты еӆӆы туты мосаӆ. Кат округ мохты там хатӆатан щи рупата туп шеӊк самӆаӆ хошиты хоятат туӆат. Ӆув онтасэӆан муӊ кушкепа моӆты вантыӆув па хуӆантыӆув.
Югра муван шоши хоятат ӆыӆ сайӆаты щиран рупитты уполномоченной щиран уӆты нэ Людмила Алфёрова каматса ясаӊ там уйтантопса эӆты ястас: «Муӊ кашӊ пуш яӆап законопроектат ханшӆув, шоши мирӆув уӆапсая ӆоӊаӆӆув. Муй хорпи нётопсайт верты, муӊ иса таӆӆаӆ ара ювам хоятат пиӆан потартыӆув. Щиты муй па па щиран верты мосаӆ. Шеӊк ям, хун муӊ Совет старейшин тайӆув. Ин ӆув окружной статус тайты питас. Кашӊ курт па вош эӆты муӊ щий делегатат пирысув. Тамащ ун вер онтасан муӊ рупатаев кентат манты питаӆ».
Щи тумпийн таӆӆаӆ ара ювам хоятат питӆат вантты, хоты сахат йис уӆапса шавиты щиран рупата манаӆ. Ясаӊ ант хурӆаты веран, каш харатан рупитты мохет муй онтас Овс мув шимӆаӊ мир вер еӆӆы туты ураӊан ищи верӆат. Щаӆта па ун хоятата энамты няврэмат пиӆан па атэӆ рупата туты мосаӆ. Ӆувиӆаӆ шоши мир уӆапсая хущты. Этнолагерят шеӊк мосмаӊа вертыя. Похла актащман рупата кеншака манты питаӆ.
Там уйтантопса хоты кущайӆув такӆы манаӆ. Щи веран щита рахас Югра Дума куща ӆаӊкар ху Еремей Айпин кащаӆаты. Ӆув там рупата тувман ар онтас шоши мир хоятӆува туӆ. Ӆув мохтэӆ иса аратаӆ законат манӆат. Аӆ хоятат уӆапса кентатты ураӊан ар юр па щём понаӆ.
«Там уйтантопса ёхтам хоятӆама мойӆапса ясаӊ китӆам. Нын онтасанан там хатӆатан муӊ шоши мирӆув хонна йис уӆапса тувман уӆӆат. Тампуш Россия Президент Владимир Путин единства Таӆа постасӆы. Щи веран муӊ па таканшак кутӆуван катӆасты питсув. Таӆӆаӆ ара ювам хоятӆув ияха акатсаӆӆув. Ун пумащипа вутщиӆам ястаты кашӊ хоята, ванты хоӆ муӊ пирасты харата яӊхсув, ямшак уӆапса муӊева пирысув. Шеӊк ӆаӊхаӆайм, ӆуӆан кашӊ районан Совет старейшин рупитас. Щи веран кашӊ куртан общественной деятельность щиран верат ямашак манты питӆат», — Еремей Айпин ястас.
Тамащ уйтантопса мохты кашӊ хоят ӆув нумасты питаӆ, ӆув ун онтас туӆ па еӆӆы туты верытаӆ. Щишан муӊева хоӆ ияха катӆасты мосаӆ. Муӊ верты рупатев эӆты муӊ няврэмӆув па хиӆыӆув уӆапса еӆӆы ӆойӆ.
Аллина Тоярова ханшам потар
