Лух Авт
Тарам опращат тайты нэ
Лыпат хойты тыӆащ ӆапатхощъяңмет хатаӆан Касом куртаң нэ, «Касум ёх» йис уӆапса ӆаваӆты таха куща, куртаң «Югра ӆыӆңоптаты» таха куща нэ Елена Терентьевна Федотова ветъяң таӆа йис. Там ванан ӆув муң редакцияева моиңа ёхтыӆыяс, муң ӆув пиӆэӆн потартсув па уӆопсаеӆ эӆты иньщассув.
– Елена Терентьевна, еша наң опращӆан эӆты потарта.
– Ма Касом куртан сэма питсам, туп ма ащем Терентий Алексеевич Федотов Поӆнават курт эӆты ус, ӆув ащеӆ Расан курт эӆты, аньтеӆ — Нум Тукъякаң курт Себуров рут эӆты ус. Опращем Ксенофонт Гаврилович Себуров ван хатӆап тыӆащ 1937-мет таӆн 15 куртаң ёх пиӆн ханяя Пупи якты хот верантас, щи вер ураңан милиция ёх хоӆыева вусат, туп кат-хуӆом хоят эсаӆсайт, хащом ёх, ӆыв кутэӆн опращем Ас хаӆты тыӆащ 8-9-мет хатӆңанан нартамӆы щаврамсайт. Шеңк паӆтап пора ус.
Ащем Пулңават вошн зооветтехникум етшаптамаӆ юпийн сыры Ванзетур, щаӆта Касом колхоза рупитты китса. Рупатаеӆ щирн ванкутн Суматвоша район куща хота яңхиӆас. Щата аньтем Софья Дмитриевна Шаркевич пиӆн уйтантас, ӆув щата ох ӆуңатты па ортты нэңа рупитас. Аньтем Тюменской область Голышмановской район Усть-Ламенка курт эӆты ус. Хунты Россия мувев хон ики хатӆ этты пелак муват аӆ щирн мас, ӆуӆн щата айӆтыева куртат ат тыйсат. Ма опращӆам Витебск вош пуңаӆн усат, щи вер эӆты оша вермаӆн ӆыв ищи щий мантсат. Мет сыры Локти, щаӆта Новолокти куртан шошмащсат. Ун ащаращем ар хот вой тайс, торн ӆэтот омсас, нюки эӆты моӆты верты заводӆ тайсаӆэ. Ӆув тащаң икия ус, щишн советской ӆащ верам порайн ӆувеӆ тащаң ху иты нартамӆы тый, Овас мувева, китса. Нялинской курт пуңаӆн аӆ вощкаса, ӆыв сыры мув хотн усат, щаӆта Нялинской куртан. Дмитрий Шаркевич ӆув похӆ, ма ащаращем Усть-Ламенка куртан ус. 1952-мет таӆн реабилитировайтом юпийн ун ащаращем щий керӆас. Щи белорусской рутӆам ариты, якты, стихат ханшты, етнхотат альты верат пеӆа самаңат усат. Ма щиремн, манэма ма Тарам опращӆам эӆты ар юр хащас.
Муң семьяевн хуӆам няврэм ус, опем, яем па ма. Ӆапат оӆа ювмемн аньтем антума йис, ма урңема ун шук ус. Ащевн энмаӆсаюв, ӆуңан щащев хоща Усть-Ламенка курта щутьщаты яңхийӆысув.
– Касом ашкулайн утаӆтыӆмаӆн муйсыр урок мет мосман тайсан?
– Ма ар киника ӆуңатсам, щишн рущ ясаң па литература урокңан самаңа тайсам. Ашкоӆа етшаптамем юпийн Ёмвошн педучилищайн ай няврэмат тайты вера утаӆтысам. Щаӆта хут таӆ заочной щирн Тупаӆ вошн Д.И. Менделеев пединститут хоща утаӆтысам, рущ ясаңа па литературая утаӆтаты нэңа йисам. Рут Касом куртэма керӆасам, тата КАШ (Касум антропологической ашкулайн) рупитты оӆңитсам. Щата «Рущ мир йис уӆопса» урок тусам, щи юпийн айӆтыева ханты мирэм йис уӆопса эӆты оша паитты питсам. Щи порайн Ольга Александровна Кравченко (Молданова) манэма арсыр верата утаӆтыӆас. Ӆув онтасаӆн ханты йис уӆопсая керӆасам. Ин хоӆна ӆувеӆ ям номасн нумман тайӆам.
– Наң «Нумсаң ёх» щутьщаты тахайн рупитсан, щи вер эӆты потарта.
– 24 таӆ ёхӆы там таха тыйс. Щит мет мосты таха. Щата няврэмат айтэӆн шоши мир йис уӆопса, верат, шукщаты па па верат эӆты оша верӆат. Щишн щий арсыр учёной ёх, верантты ёх, ариты-якты ёх вохсув. Там тахая яңхам няврэмат ин уна йисат па арсыр тахетн рупитӆат, хойтат шоши мир театран, хойтат ариты-якты вер еӆӆы туӆат, ӆыв хоӆыева шоши мир йис верат там йис уӆопсая туӆат. Муң, ванты, няврэмӆув пиӆн Вутвош (Юильск), Туром Ӆорвош (Нумто) па па ай куртата яңхийӆысув. Итухӆ хоятат еӆӆы рут вут куртӆаӆа керӆасат па вуӆы тащ ӆаваӆты, хуӆ па вой веӆпасӆаты питсат — щит ищи ям! Уна ювмаӆн ӆыв самаңа верат уйтсат — щит муң урңева ун амат.
– «Касом» нэмпи йис уӆопса ӆаваӆты таха рупата эӆты потарта.
– Муң ин там йис яӆап щирн рупата ӆэщатты питсув, щит ураңан арсыр охаң касопсэтн касты питсув. Ин «Моньщ юш» вер ӆэщатӆув, Андрей Александрович Ерныхов похат Пупи якхот вой арата утаӆтаты питӆ. М.В. Кабакова «Дом сновидений» вер ӆэщатӆ. Щи томпи «Таӆаң ёш, таӆаң кур» вер ӆэщатман хоятат мосты порайн лекщитты торнат акатты утаӆтыӆӆув. Хоӆна ар номас тайӆув.
– Елена Терентьевна, нуптэн ветъяңа щи ювмаӆ, ищи арат еӆӆы уӆа! Тарам опращӆан партам щирн, аӆом щирн туң юш хуват шуша! Рущ па ханты йис уӆопса еӆӆы тува!
Людмила Шульгина ханшам потар
Авторы
Лух Авт
Темы