Лух Авт
Тёпаӊ па мосмаӊ антета юкантам хатӆ
Ӆапатнаӊк вошан, «Едейко» ай няврэмат хатӆ сыс яӊхты хотан ун емаӊ хатӆ манас. Уйтантопсаеӆ «Тёпаӊ па мосмаӊ антие» нэман понман уӆ. Няврэмиет ай пора эӆты, туп потарты питӆат, мохты ӆуӊтарат ӆуӊатӆат па арат арыӆат, щиты ӆув альӆат, хоты шеӊк мосмаӊа антиеӆ тайӆэӆ.
Там емаӊ хатӆ верам порайн, Ӆапатнаӊк вошан уӆты антет-ащет няврэмӆаӆ пиӆан, кашӊ ӆув рут мир сохат ӆуматман арысат, яксат, каш альсат. Хон мувев маты мув сыӆан мосмаӊ антет уӆлат, потар тусат. Муӊ ханты хоятӆув ищи ӆув самаӊа тайты хоятэӆ эӆты потартсат. Хоятӆув кутан тэӆые арыты, якты па каш альты хоят уӆ.
Наталья Фёдоровна Тырлина Эмилия па Виктория хиӆэӊӊаӆаӆ «Брусничка» группая яӊхӆаӊан. Уйтантопсая ёхтам хоятат ещаӆ мойӆапса ясаӊ ханты па рущ ясаӊан ястасат. Анти эӆты ар арысат па ёшан ёнтам пормасат эӆты вантапса этаӆтасат: аканят, онтапат, сак лопсат, юх эӆты верам паварт хот, ай хоп ӆупӆаӆ пиӆан па ӆонщхоп.
Няврэмат хатӆ сыс яӊхты хотан рупитты нэ Лариса Васильевна Муслимова (Куртямова) «Княженичка» группа няврэмӆаӆ па ӆув ащиӆаӆ-антиӆаӆ пиӆан ханты сохат эӆты потар тусат. Муй хорпи таӆ па ӆуӊ, нэ, ху па няврэм сохат уӆӆыӆат. Муй щиран ӆув ёнтӆайт. Юхат хоӆыена ханты сох ӆуматман, умащӆыман па хорамаӊа карыман, актащам хоятат ещаӆ шушиӆысат.
«Тыхӆые» группайн Юлия Леонидовна Макарова рупитаӆ. Ӆув ханты як якас, Паша похаӆ пенщар сэӊкас, Рената эвеӆ па луӊханщап сыйӊаӆтас. Анна Сотруева хоттэӆ мохиӆаӆ пиӆан «Кер вой па ай вой» монщ альсат.
Каш ӆэщатам хоятат хоӆыена мойӆапса нэпекатан мойӆаптасайт. Уйтантопса етшам юпийн йи пасан суран шай йинщсат, потрэмисат.
Иса тамиты щи, сыстам номас тайман, нови веншан вантман, ям ясаӊ потарман кутӆуван уӆты мосаӆ.
Зоя Куртямова ханшам потар
Авторы
Лух Авт
Темы