Лух Авт
Туңк – шеңк мосты пормас
Катра верат нумаӆмиты ураңан тата Ольга Хоротэтто (Русмиленко) туңк эӆты потартыйм потар понӆув. Муй ураңан катра па там хатӆатан ӆув мосман тайӆа па муй онтас ӆув ханты мира туӆ.
Ольга Константиновна аратаӆ мира «Рут ясңаң лайфхак» эӆты потар тус, хоты ӆув семьяеӆан, па па ханты мир кутан, хоӆта туңк мосмитыйӆ.
«Туңк — ар таӆпи ӆэпат лыптые, варс юкан ятӆаӆ хува па щакаляңа энамӆат. Ӆув имохты энамаӆ па ӆыйӆ. Нум ятаӆ 5 см унты энамаӆ, хорасаӆ восты лыпат эӆты хойм лыпат унты па вуртыя ищки порайн ювантыйӆ. Кутӆапаӆ 5-10 см восты лыпат эӆты хойм лыпат унты оляптыйӆ. Иӆтайӆ хлорофилл тайӆ, айӆтыена ӆыйӆ па туңра мува йиӆ.
Унтан па нюраман уӆӆытэван туңк утлап юкана тайӆэв. Ан, ёш, папев муңхиӆыӆув. Ищиты катра муң йис ёхӆув верыӆысат, хун касӆыман яңхиӆысат.
Щи порайн хонна туңк мохты йиңк эсӆыӆыса, сыстам йиңк йинщиӆыса. Ин унтан уӆӆытэван ищиты щи йиңкев сыстаптаӆэв.
Катра порайн хуӆ па нёхи потаӆтаты шуп антом уӆаман туңка ёвармиман шависа. Мув вусат хирыӆысайт па руваң хатӆатан ӆэтотат шависайт.
Туңк шеңк яма йиңк акатӆ, щишан ай няврэмат онтпа поныӆыӆа, щиты ма щащем похаӆа верыӆысӆы — ма ащема. Тухаӆ хоятат па поӆт поныӆысат, щит ищи ям. Няврэм сорам па хошам тахайн оӆаӆ.
Ун Ӆяӆь порайн, хун нюлам ёвартты щашкан антом ус па вур ант манты ураңан — иса туңкан ёвартыса. Там хатӆатан, учёной хоятат, туңк ям верат хонна ӆэрапӆат, еӆӆы хатӆатан уӆапсаеван тайты ураңан.
Туңк ямас ӆыйтаӆ юпийн туңра мува йиӆ. Лыпат энмаӆты порайн шеңк ун онтас туӆ, ӆув аӆ мув азотан тэкнаптаӆӆы. Туңра мув вощрэм руваӆ пиӆан хаӆтыя вутщийм мув пиӆан руватӆа. Ӆувеӆ мосаӆ сэй хиш, лавам па кеван уӆӆыты перлит пиӆан ияха руватты. Щи порайн лыптат па торнат яма энамты питӆат», — Ольга ястас.
Муң ханты мирэв хоща ар ёрэмам вер уӆ. Щишан нын муңева ищи нётаты, айкеӆ вераты. Нын потартыйм верӆан газетая па соцсети хоща понӆаӆӆув. Ияха нумаӆмиӆӆув, еӆӆы хайӆаӆӆув.
Аллина Тоярова ӆэщатсаӆӆы
Авторы
Лух Авт
Темы