Лух Авт
Тунщинкурт эӆты йис Смолин рут ёх
Щимащ вантопса хащам ятан «Торум Маа» нэмпи катра пормасат ӆаваӆты хотн ус. Щий Смолинат, Езинат, Новицкой рут ёх актащсат.
Там вантопса туты нэ Ирина Ксенофонтова ястас:
– Ханты Смолин рут Тунщинкурт эӆты, щит Ай Ӆэв ёхан хонаңан омасӆ. Там рут Антим Смолин эӆты оӆңитса па ин ихощъяң нупта йис. Щи рут хатнэхоятат — ям хуӆ па вой веӆпасӆаты ёх, там йис унты ӆыв щи вер яма тайӆат. Щи тумпийн там порайн щи рут хатнэхоятат арсыр рупатайт туӆат, туп йис уӆапсэӆ ӆаваӆман тайӆат.
Хунты Смолин рут хоща мойңа йис уӆапса ӆэрамтты учёной ёх ёхтыӆысат. Александр Александрович Дунин-Горкавич щи мувн рупитмаӆн ванкутн Смолин рут хоща мойңа яңхас. Щита тухаӆ ишан Владислав Михайлович Кулемзин, Надежда Васильевна Лукина па Ева Адамовна Шмидт усат.
Смолин рут эӆты айкеӆат Елена Григорьевна Смирнова (Смолина) актас, там вантопсайн ӆув потартас:
– Манэма айтэӆн йис рутэм эӆты умащ уйтты ус. Ма ванкутн ащем Григорий Прокопьевич Смолин эӆты инщассам. Ӆув, ванты, ая уӆмаӆн антиӆы-ащиӆы хащас, туп рутӆ эӆты яма уйтсаӆы. Ма 2004-мет таӆ вуш эӆты рутэм эӆты айкеӆат каншмемн киникайт ӆуңатты, катра нэпекат ӆаваӆты хотатн рупитсам. Умща йис, арсыр учёной ёх муң рутэв эӆты ханшсат.
«Торум Маа» музей хоща наука верат туты нэ Раиса Решетникова ястас:
– Ма хувн там хоттэӆ уйтӆэм, щишн рупитты кен ус. 2023-мет таӆн Елена Смирнова пиӆн уйтантысам. Ӆув Смолин рут верам ӆэраӆ аляс, хонна щий рутӆаӆ эӆты ханшас. Щи тумпийн арсыр хорат, ӆыв рутэӆ 30 моӆтас пормас уйтас, ин щитат ищи там вантопсайн вантты рахӆ. Там пормасат нэмат Ас ханты ясаңан ханшман уӆӆат. Щи тумпийн там вантопсайн Смолин рут воӆаң ёх уӆапса эӆты оша верты верытӆаты.
Григорий Прокопьевич па Мария Ефимовна Смолинңан Ас ханты хоятңан, ӆын рут ясаң яма тайсаңан. Елена эван потартас:
– Антем-ащем Ас ханты ясаңан потартсаңан. Ӆын йис потрат, монщат, арат уйтсаңан. Ӆын мадьяр мир учёной имия Ева Шмидта щитат потартсаңан. Там вантопсайн Ева Адамовна Шмидт эӆты пищма уӆ, ӆув Нови саңхам вош эӆты ӆынана ханшас.
Мойң ёх Григорий Прокопьевич Смолинан арыйм арат хуӆантсат. Щи юпийн Смолин рут имет «Кук-кук Най» ар арысат.
Ирина Ксенофонтова еӆӆы ястас:
– Григорий Смолин — ям веӆпас &$! ус, уӆапсайӆ сыс 60 мойпар, 200 кураң вой, 105 нёхас вой па па войт веӆпасас. Овас мув эӆты 80 вуӆы тус. Ӆув ям па номпсаң амп тайс. Ин ӆув верӆ Поӆнават куртаң хуйн Александр Васильевич Аксёновн еӆӆы туӆа.
Елена Смолина антеӆ Мария Ефимовна Смолина (Езина) эӆты айкеӆ тус:
– Хунты Шаншвошн рущ Новицкой тащаң ёх шошмащсат. Куртат хуват яңхман хантэт эӆты хуӆ па тынаң вой сох ӆутсат. Щи порайн Ефим Иванович Новицкий Ай Ӆэв ёхан хонаңан омпсам Тунщинкурт эӆты Шаншвоша ма аңкаңкем Татьяна Ильинична Езина тус. Ӆын семьяеӆан ма антем Мария сэма питас. Еша усңан па катна мантсаңан, щишн аңкаңкем ёхӆы керӆас. Антем уна йис, Григорий Прокопьевич Смолин хоща икия манас. Ӆын ияха веӆпасӆасңан, монщсаңан, арысңан.
Григорий Смолин веңӆ Василий Кузьмич Аксёнов иса уйтам верӆаӆа утаӆтасӆы. Василий Аксёнов Ас ханты ясаң яма тайсаӆы, щишн ӆувеӆа Ас ханты ясаң утаӆтаты нэпек ӆэщатты нётас. Ӆув эвеӆ Ираида Васильевна Аксёнова «Ёмвош ёх» арыты тахая яңхаӆ, тамхатӆ муң «Унши юх ёхам хуват» ар арысув.
Людмила Шульгина ханшам потар
Авторы
Лух Авт
Темы