Лух Авт
Туса ёнтасты нэ верам айкеӆат
Там йисн туса ёнтасты па верантты хантэт ӆэваса ищипа ант верытӆан уятты. Щи ураңан тамхатӆ тус ёӆ ёнтты нэ Раиса Петровна Загородняя (эви опращ нэмаӆ щирн, Рябчикова) эӆты мортаң айкеӆат ханштыя вутщиӆам. Щиканьща Суматвошан рупатаем щирн яңхмеман, ӆув пиӆэӆан уйтантысам па потрэмисам.
Тамхатӆ Раиса Петровна ёӆан щутщаман пенсияйн сэма питам па айтэӆн энмам Пухар куртаӆан Суматвош районаӆан уӆ. Уӆапсайӆ хуватн шоши мират культура, якты-арыты, арсыр ханты ӆуматты сохат ёнттыя па пормасат верты тахаятан ус па рупитас. Мет оӆаңан ӆув Нови саңхам вошан овас ёхат уӆапса щират туты тахайн рупата тайс. Юхатшак па Суматвош район шоши мират хотъятан кущая ус па ищиты шеңк самаңа ханты муй охаль мирңан якты-арыты, йис пормас па ёнтасты верата катӆасыман, кашң айшак па уншак вер туса ӆэщатас. Муй щирн катра рупитас, ӆувеӆ тата щи иньщассэм.
– Раиса Петровна, мата таӆ вушат эӆты овас мир культура тахаятан рупитсан?
– Иса 1990-мет таӆ вуш эӆты Нови саңхам районэв хоща «Мойпар як» нэмпи якты-арыты таха Семён Иванович Юхлымов катра ӆэщатыйс. Муң оӆаңан щи па яңхсув. Мосты порайн, ванта, ханты арат арысув, нэ якат туса яксув.
Щи тахайн аратэӆан 10 хатнэху ус: няӆ ху па хут нэ. Ху хоятат па ар пелак иса ӆоңаӆтоп якты-арыты щират арсыр мират еӆпийн хорамаңа ванӆтасат, муң — аӆ ханты нэ якат яксув па уӆты-хоӆты щирӆув эӆты арат арысув. Сыр-сыр ай куртата па уншак вошата муң Югра мувев ӆоватн иса щи яңхсув. Юхат па Пулңават воша Ямал мува тутлисаюв, хота муң верам «Мойпар як» нэм тайты тахаев ищиты арсыр овас мир ёхӆув кутн якты-арыты хотат хорасаңа ванӆтас. Щаӆта Ас хаӆты тыӆащ оӆаң хатӆатан 1993-мет таӆн мет оӆаң пуш па хон пелка вохсаюв. Щи таӆатан «Мойпар як» тахаев Перник нэмпи ун воша Болгария мува яңхас па арсыр мират еӆпийн якты-арыты хотат верас. Россия па сыр-сыр хон пелкат эӆты славяната уӆты хоятат, ванта, щий ияха ёхаттыя верытсат. Муң па щи ураңан вохсаюв, хоты «Мойпар якаң» якты-арыты тахаевн ху ёхӆув лоңаӆтоп як щират альтыя кутатн хоӆыева тонты веншаң хорасат тайсат. Болгарат, ванта, щи таӆ пораятн «Лап ханятам веншаң ёхат» емаң хатӆ ӆый кутэӆн порыӆысат. Шеңк яма па самаңа муң ханты якӆув-арӆув арсыр миратн ошаңа версайт.
– Наң ям ар таӆ сыс сыр-сыр ханты ӆуматты сохат ёнтӆан па арсыр пормасат туңа щира па умща ӆэщатӆан, щимащ верат эӆты матты айкеӆ муңева тува.
– Ёнтасты вер — мет самаңа айтэӆн тайты верэм. Аңкем катра порайн етна пелка иса ёнтасас. Ма ищиты ӆув пуңӆаӆан омасӆам па моӆтэт ёнтсам. Щаӆта вантсам, муй щирн вой сохат ӆэпта татаӆтыя па муйсыр сох эӆты муй ёнттыя.
Тата ма вутщиӆам ястатыя, хоты Суматвош районаң шоши мират хотъятэван хуӆамкем таӆ сыс ма ёшңаӆаман ёнтам па туса верам соткем арсыр ханты нэ ӆуматты сохат, пормасыет вантопса щирн ӆэщатман тамхатӆ унты тайӆайт.
Щит иса ханшийн эвтам нуй сахат, нэ муй ху ернасат, посат, нират, паннэ па сорт сох эӆты ёнтам хирыет, тутщаңат, сак эӆты картам турлопсат, тутхотат верман уӆӆат.
Там таӆн охаль нэңат тайты нуй сах па ёнтсам. Щитэм ёнттыя еша кеншак ус, ванта, ханты нэңат сах хоща аршак ханши эваттыя мосаӆ. Щи ураңан, щи муң нуй сахӆув тащаңшакат па хорамаңшакат кашң пуш вантасӆат.
Владимир Енов ханшам потар
Авторы
Лух Авт
Темы