Лух Авт
Туса вератты хатнэху пиӆн уйтантысам
Туняӆ ӆуңан лыпат тыӆащ яртъяңмет хатаӆн Пулңават вошн Ямал мувев хоща «Нюрам мув ӆыӆ» нэмпи Мувтэӆ мир емаң хатӆ ун кущайт ӆэщатысат. Щи порайн ма ищиты рупатаем щирн щита усам па арсыр айкеӆат каншсам.
Щиңанща тынасты-ӆутасты хар верса, хота хантэт, ёрнат, саранат, рущат па сыр-сыр ияха ёхтам овас мир хоятат ёшатн верам пормасат па ӆуматты сохат ванӆтатыя па еӆ тыныты щирата ӆэщатсат. Имоӆтыйн, тыеӆ-тохеӆ яңхман, туса вератты ханты ёхӆам пасан еӆпия ванамасам. Щиты Анатолий Павлович Сотруев пиӆн уйтантысам па ӆув эӆтайӆ там кутн мортаң, ям айкеӆат вусам.
– Анатолий Павлович, мет оӆаңан наң эӆтаен матты умащ айкеӆ тува, мата тахайн па усан, муйсыр верат вантсан, па ин тамхатӆ хота уӆӆан па рупитӆан?
– Ма уӆапсаем хуватн хорат ханшты хоята рупитӆам. Щимащ шеңк мосты верэм тумпийн, па юх муй ӆоват эӆты арсыр пормасыет туса па хорамаңа ин эватӆам. Щаӆта Ямальской многопрофильной колледж нэмпи тахайн унашак ювам похат па эвет утаӆтаӆам. Щи тахаем хоща нийӆмет таӆ рупитӆам. Туса вератты щирэм онтасн Россия мув Народной мастер нэмн юкантсайм.
Оӆаң порайн ма там Пулңават вош культпросветучилища етшаптасам. Щи юпийн иса 1989-мет таӆ вуш эӆты тата Художественной ашкуӆа хоща манэма рупата мощатсам, хота ищиты хорат ханшсам па вет таӆ сыс рупитсам. Юхат Юной техникат тахая кущаятн хущсайм. Щиңанща щита ищи арсыр ай няврэмат юх па ӆов эӆты ай пормасыет эваттыя хошты щирэмн утаӆтасам.
Юхат Аксарка вошн Приуральской районан усам па кутоп ашкуӆайн рупата тайсам. Таӆаң 12 таӆ сыс щи тахайн унашак ювам похат па эвет юх па ӆов эӆты сыр-сыр ай пормасат эватты щирата утаӆтасам. Ин иса тата, колледж хоща, ёрн па ханты няврэмат пиӆн волкемаӆам. Ёхи хащам порайн ма урокӆама иса эвет ёхаттыя питсат, похат па там йисн шеңк шимаӆ муң хощаева утаӆтыйӆ.
– Муй ураңан наң хорат ханштыя па ханты пормасат туса вертыя питсан?
– Щит Екатерина ун опемн айтэӆн вератты хоята йиты хущсайм. Катра ӆув Аксарка вошн уӆты йис пормасат шавиты хот куща нэңа ус па рупитас. Уӆапсаем хуватн опемн ӆаваӆман па вантман тайсайм. Ӆув ин сорма питас.
– Анатолий Павлович, тамащ Мувтэӆ мир «Нюрам мув ӆыӆ» емаң хатӆатн наң, аӆпа, кашң порайн уӆӆан па ёшңаӆанан верам ханты пормасат арсыр хоятата еӆ тыныӆан?
– Анта, кашң порайн хоты тый ант па яңхӆам. Там кутн туп тый ёхатсам. Мет оӆаңан тынасты-ӆутасты щирн ма верам пормасӆам пасанэм хуваттыйн лакки понтсаӆам. Щаӆта кутн-кутн ёхат па нэңат арпелак эӆты ӆыеӆ вантсат муй артаӆасат, тухаӆ нялэт па ӆыйт ищи куромн ма эӆтаем ӆутсайт. Кашң мойң хоята, ванта, иса умащ муң ханты пормасӆув. Щи ванӆтопсаем тумпийн, емаң хатӆ верам куща ёхӆамн ма нэман тый вохсайм, ӆуӆан арсыр вератты хатнэху пормасат муй ӆуматты сохат ямсыева артаӆасам па ястатыя верытсам, муй хораспи отат мет туса па хорамаңа ӆэщатсайт. Щаха, ванта, там емаң хатӆ соханты кемн ӆый арсыр мойӆапсаятн юкантты тата питӆайт.
– Муйсыр пормасат мет яма тый ёхтыӆыйм мойң хоятат наң эӆтаен ӆутсат?
– Щит ӆов эӆты верам вуӆы па вэс ики хорасат, юх нялэт па ӆыйт, муй арсыр ай тынӆышак пормасыет. Щи тумпийн, ма, ванта, ху ёх антопат туңа щира па хорамаңа ӆэщатӆам. Щитӆам па ищиты там хатаӆн хуӆ веӆпасӆатыя муй вуӆы тащатн яңхтыя хоятатн ӆутсайт. Ма щирэмн, мет яма там емаң хатӆат порайн юх эӆты верам хуванат мойң ёхӆуван каншӆайт па иньщасӆайт. Аӆпа, мойӆапсайт ураңан щитат ӆутӆайт, мосаң, аӆ умащ верат ураңан щимащ юх ан хоятат ёшңаӆаӆа мощатӆат?
– Анатолий Павлович, «Нюрам мув ӆыӆ» емаң хатӆат муйсыр онтас там ёхи хащам порайн нынана вертыя верытӆ, мосӆ ӆув муй анта?
– Ма щирэмн, тамащ ун емаң хатӆат муңев ищипа шеңк мосӆат. Ванта, щи порайн муң верам пормасӆув еӆ тыныӆӆув, рут ёхӆув пиӆн уйтантыӆув, арсыр яӆап туса вератты щират оша верӆув. Щи емаң хатӆата муң иса амтатлиӆув!
Владимир Енов ханшам потар
Авторы
Лух Авт
Темы