Лух Авт
Тут хуратты ёх емаӊ хатӆ
Хон мувев ӆоватан, ун кер тыӆащ 30-мет хатаӆн, тут хуратты хоятат емаӊ хатӆэӆ постасэӆ. Щимащ рупитты хоятат кашӊ ун па ай вошатан уӆӆат. Щи каркам хоятат рупата воӆаӊ ант ныӆа. Туп хун атом вер, тут суӆтам питтыйн, ӆув сора, мет оӆӊа ёхатӆат.
Там емаӊ хатӆ постаты ураӊна, 1999-мет таӆн Россия мувев куща Борис Ельцин, партапса ханшас. Аратӆ па мир ӆоватан, тут хуратты ёх емаӊ хатӆ Ас нопатты тылащ 4-мет хатаӆн постаӆа.
Ун кер тыӆащ 30-мет хатаӆн 1649-таӆн, Россия хон ики Алексей Михайлович мет оӆаӊ нэпек ӆэщатас, хота ханшман ус, хоты мосаӆ тут хуратты щиран атаӊ-хатӆ рупитты. Щи пора эӆты там ӆаварт па шеӊк мосты рупата ямашак постаты па ӆэщатты питса. Емаӊ хатӆаӆ 377 таӆа йис. Рупиты ёх ям ясаӊан ястасайт, ишак нэпекатан па меваӆ посатан юкантсайт. Ханты ёх кутан, тамащ мосты рупатайн, ищи ар хоят рупитаӆ.
Ай пора эӆты уйтты рупатаем
Щиты Россия МЧС внутренней служба сержант Андрей Олегович Тыликов ястаӆ. Ӆув курк тыӆащ оӆаӊмет хатӆ 2021-мет таӆ эӆты Пулӊаватан тут хуратты щиран рупитаӆ.
– Ма 1997-мет таӆн Овкуртан сэма питсам па щита энампсам. Овкуртан ищи пожарной часть уӆ. Ма тохи ай пора эӆты ӆоӊтысам, –Андрей Тыликов ястаӆ. — Щита ма акаем, Артём Тыликов, рупитас. Щишан ма ван кутан ӆув хощайӆ яӊхиӆысам па вантысам, ӆув рупатайӆ муй хорпи. Рупитты хоптанӆаӆ ӆумтыӆысӆам па машина ӆыпия омпсыӆысам. Ищи нумассам, хун энамӆам, акаем иты рупитты питӆам. Ин щи номпсэм еӆӆы туӆэм.
Пора сора хащас, Андрей энмас. Ашкуӆайн утаӆтыман, юраӊа йиты ураӊна, арсыр касапсаята яӊхас: ухаӆ шоппи наврас, тынщаӊ ёвӆас, хухатӆыйс, волейбол па баскетбол щиран ёнтас. «Патриоты Сыни» нэмпи командая ӆоӊман ус, ар тахаята касты яӊхас па ар пуш нох питыӆыйс.
– Ма 2015-мет таӆн Овкурт ашкуӆа етшаптасам па мохты Хон Петра воша утаӆтыты мантсам. Щита «Пожарно-спасательной колледж» хоща центр подготовки спасателей уӆ. Веӆщи утаӆтыты питсам па кимет таӆн соӆтана китсайм, — Андрей Олегович потарӆ. — Щаӆта 2017-мет таӆн ёхӆы утаӆтыты тахаема ёхатсам па 2019-мет таӆн ӆувеӆ етшаптасэм. Еӆӆы па, щи таӆан, мохты заочной щиран, уншак тахая утаӆтыты нэпекӆам китсаӆӆам па Пулӊавта мантсам, «Ямалспас» хоща рупатая ӆоӊксам.
Щита ӆув кат таӆ рупитас па 2021-мет таӆн тут хуратты тахая рупитты вохса. Яма па вещката рупитты ураӊна, каматса таӆ хащаман, оӆаӊмет пожарно-спасательной часть отделение куща унты эӆатса. Хоӆна таӆ шуп рупитмаӆ юпина па нохшак эӆатса. Ин ӆув Пулӊаватан оӆаӊмет пожарно-спасательной часть караул куща хоща нётты ӆаӊкар хоята понман рупитаӆ. Туняӆ, Россия МЧС эӆты «За заслуги» нэмпи меваӆ посан, мойӆаптаса.
Там хащам емаӊ хатаӆан, Ямал мув губернатор тут хуратты хоятӆув хоща ёхтыӆыйс па яма рупитам ёх мойӆаптасӆы. Щи кутан, Андрей Тыликов нэмаӆ па щащас. Ӆув «За спасение на пожаре» нэмпи меваӆ посан юкантса.
Хун Андрей тамащ рупата щира утаӆтыты питас, иса антеӆан ям ясаӊан ястыӆыса па потартыӆыса. Ин похиеӆ яма рупитты ураӊна антеӆ иса амтатӆыйӆ. Щишн, Андрей Тыликов ястаӆ: «Антием ястам ям ясаӊ нумӆэм, рупатаем самаӊа тайӆэм па кимет рупата манэм ант мосаӆ!».
Иван Сандрин ханшам потар
Авторы
Лух Авт
Темы