Лух Авт
Ӆуӊ кутоп хатӆ
Унт ӆор тыӆащ кимет хатӆ Овс мув шимӆаӊ мир ёх кутан ун емаӊ хатӆа ӆуӊтасаӆ. Хантэт «Ӆуӊ кутоп хатӆ» ястаӆат, урат па «Та’ ер’ яля» там хатӆэӆ аяӆӆэӆ. Рущ мир па тамхатӆ «Илья хатӆ» постаӆат.
Куш муй щиран яста, хоты сахат аяӆты, ищи па емаӊ хатӆ. Тамхатӆ рупитты ант рахтаӆ, шеӊк ун карэк. Ӆуӊев сус пеӆа керӆаӆ: Хатӆ кутоп унты — ӆуӊ, етна пеӆа манты хатӆ шупаӆ — сус. Катра там хатӆ эӆты няврэмат ёханан певаӆты ант эсаӆӆайт. Пеӆӊайт шимӆа йиты питӆат. Йи пеӆӊа параттэнан, яӊ антома йиӆ.
Тащ хотатан там порайн таӆ ӆуматты сох ёнтты ураӊан вуӆэт хорӆайт. Там йисан вуӆы сохаӆ куӆ, пунаӆ шик, ӆэпат па так. Мохет ёхӆы пеӆа касаӆты щира ӆэщатыӆат. Хуӆ веӆпасӆаты ёх хуӆ сораӆӆат, соӆытӆат, пусаӊан восытӆат. Нэӊат хуӆвой кавартӆат, вонщамотат акатӆат. Хот воӆан энмаӆты вой тайты хоятат торн вертыя куртӆаӆ пеӆа касаӆӆат.
Емаӊ хатӆ порыӆытыйн, рут мир ёх таӆаӊ хоттэӆатан актащӆат. Найӊ хатаӆан пасан каман омасӆа. Рат харан нёхи па хуӆы путат кавартӆайт. Няр хуӆ, няр нёхи ӆэщатӆа. Няврэмат ёнтман хухатӆыӆат. Айӆат ёх па ун хоятат касты харатан юращӆат.
Хащам хошам хатӆат сыс хоӆна ар рупата верты мосаӆ. Ищки туты хатӆата туӊа-щира ӆэщатыты.
Уӆапсаев щиты щи и еӆӆы манаӆ. Онас иты касаӆман и еӆ хатаӆ. Няврэмат, ун хоятат тумтака ат уӆӆат. Войӆан шавиман таяӆан. Шук туты ляль ат етшаӆ, ёх хоятӆув, няврэмӆув ёхи ат ёхатӆат. Турам пеӆа пойкащман, умащ ясӊев, сыстам уӆапсаев, йис ёх хошам щирӆув веӆщи энамты ай няврэмӆув кеша шавиӆэв па еӆӆы туӆэв.
Зоя Куртямова ханшам потар
Авторы
Лух Авт
Темы