Лух Авт
Ӆуң кутоп хатӆэв постасэв
Унт ӆор тыӆащ кимет хатаӆан кашң вошан, кашң куртан аратаӆ мир яха актащийс па Ӆуң кутоп хатӆаӆ постыӆыйс. Там йисан нэмоӆты хоятан хонна ант нумӆа, хун там емаң хатӆ тыйс, мосаң мув опсантам вуш эӆты. Туп там хатӆэв унты хоятат актащиӆат, порыӆыӆат.
Ӆуң кутоп хатӆ юпийн атӆув патлама йиӆат, нэмоӆты хоят йиңка полщематы па ант ӆоңтыйӆ, пеӆңайт шеңк такан ант паңиӆат, камн ёлах вотрув поӆӆыйӆ.
Хоты там хатӆ Овкуртан порыӆыса, щит эӆты Галина Гавриловна Артанзеева ясаң тус, ӆув куртаң каш верты хотан кущая уӆ: «Ӆуң кутоп хатаӆан, Илья хатаӆан муң кашң пуш порыӆыты харэван куртаң мир актыӆыӆув. Сан кушмаӆтысув, пасан омпсыӆысув, порыӆысув. Хорамаң щашкан ӆэрӆув щелох пиӆан сумта ярыӆысув, пойкащисув. Ёхтам хоятӆув каврам хошъйиңкан, шайн йинщаӆтасӆув. Аратаӆ мирэв касты ӆоймтыйс, мойӆапсайт ёша вуйӆыйс. Кутӆаӆан хоӆ емаң хатӆ кеша мойӆапса ясаң ястасат. Щи кутан «Щаня ёх» араң-монщаң группаев ар сухтэмийс, ощхуль потар тувемийс. Хоӆ ям номасан лакки мантсат, па уйтантытэв унты».
Кеван яңхты ёхӆув вуӆы хорыӆысат, пойкащисат, йи хот хоятӆаӆ, йи ратаң рутӆаӆ пиӆан йи пасан суран актащисат. Еӆӆы хатӆатан вуӆы тащӆаӆ ат энамӆат, касӆыты юшеӆ кен ат уӆ.
Хуӆ веӆпасӆаты мохиӆув ноптаӆты панӆаӆан, уӆты куртӆаӆан ищиты Ӆуң кутоп хатӆэӆ постасэӆ. Ханты хуӆ эӆты хошъйиңк кавартысат, пойкащисат, порыӆысат. Ӆув хоӆапӆаӆа аршак хуӆ ат хойӆ, щеп охеӆ ат энмаӆ, ертаң, вотаң па пеӆңайң хатӆ шимаӆшак ат уӆ.
Ханамӆув па ханамнэңӆув, тумтака уӆаты! Рупатайн, уӆапсайн нын ӆаңхаты щиранан ат манаӆ. Няврэмӆанан, хиӆыӆанан мосмаңа ат тайӆайты, моӆты веран иса ат нётӆайты. Рутӆан-сырӆан пиӆан вещката уӆаты. Ойңа-пищаңа, йисаңа-нуптаңа!
Аллина Тоярова ханшам потар
Авторы
Лух Авт
Темы