Лух Авт
Ӆуң сыс хуӆ веӆпасӆаты пора ёхтас
Ӆуң порая йис. Хуӆ веӆпасӆаты ёх ноптаӆты панӆаӆа касаӆсат. Рыбозавод эӆты мосты пормасатан иса масайт. Мотурӆаӆ туңа щира рупитӆат, бензин пущкайӆаӆ тэӆаңат. Щишан, туп ям па тэваң хатӆат ат уӆӆат.
ООО «Горковской рыбозавод» главный инженер Михаил Созонов ясаң щиран: «2024-мет таӆан муңев аратаӆан 1024 тонна мощатты мосаӆ. Таӆ питщам сыс 52 тонна мощатсув, еңк манам юпийн 7 тонна па мийман уса. Горковской, Лопхаринской па Азовской рыбоучастката ӆашкупат тусув. Ин хуӆ веӆты ёхӆув арпелак тув хуӆ, сорт, ханшаң хуӆ мийӆыӆат».
«Ямал ӆоватан таӆ шуп сыс мет артан Тазовской районан хуӆ мощатса — 201, 3 тонна. Сорт, мевты, паннэ, сарх, щёхар, ӆар — кашң пуш артан рыбозавода мийӆыӆа. Хой хуӆ веӆпасӆаты предприятияя ӆуңтасаӆ, мосты пормасат иса маӆа, нётӆа, кущайт хуӆ веӆпасӆаты паната яңхӆат па инщасӆат, муй хорпи нётопсайт мосӆат», — ЯНАО АПК департамент куща ӆаңкар нэ Любовь Охман ясаң верас.
Хуӆ веӆпасӆаты предприятияйт округ эӆты охан нётӆайт. Ванты, там хатӆатан хуӆ шеңк тынӆы вуӆа. Нётопса онтасан кашң рыбак туңа щира щеп охаӆ тэкнаптаты верытӆаӆӆы. Щи тумпийн, предприятие хоща уӆты тутаң хопат тут йиңкан понты мосӆат, ӆашкупат йи таха эӆты кимет тахая таӆӆыты ураңан. Нётопса охат эӆты хоӆап, ӆуматты сох, сопек, пос, ерт сохат ӆутӆайт.
Муй хорпи яӆап айкеӆат хуӆӆув, кашң пуш ханшиӆыты питӆув. Ноптаӆты панатан уӆты ёхӆув аршак хуӆ ат мощатӆат, тумтака ат яңхӆат!
Аллина Тоярова ханшам потар
Авторы
Лух Авт
Темы