Лух Авт
Уӆапсаеӆ кентат, тащаӊа, нуптаӊа ат манаӆ
Ямал мув там пуш сот пеӆа вет таӆа щи йиӆ. Тыйм порайӆ эӆты, кашӊ таӆ сыс хоятат уӆапса яммаӆты ураӊан ар верӆа. Округеван хуӆ веӆпасӆаты ёха па вуӆы шавиты мохета нётты вер мет такан тайӆа. Ванты, там муван йис пора эӆты тувам верат иса ат нумӆайт па еӆӆы туӆайт.
Хащам ятатан вуӆэӊ ёх рупатаеӆ кенашак верты кеша, мосты пормасат маты питсайт. Шоши мир уӆапсайн уӆты мохет хот ӆонщты улатан, нови тут маты мутраятан, портунаӊ хошапатан, юх эватты картыйн, хоӆпатан, хот лаӊкты, мосты пормас ёнтты, нуйн, парщинан маӆайт. Антиӆы-ащиӆы энамты хоятат, касаӆман уӆты ураӊан, щимащ пормасатан мохты маӆайт. Там йисан, куш муй мув суӊан ху вуӆэӆ пиӆан яӊхаӆ, айкеӆ верты спутниковой телефон тайӆ, еӆпи туп рация хуват потарты рахас. Катра рация ӆаварт шуп, хот эӆты хува ант аӆӆэн.
Овс мув шимӆаӊ мир энамты мохиӆув утаӆтыты кеша охан иса нётӆайт. Яма утаӆтыты ураӊан, сертификатат, субсидияйт, стипендияйт шитӆат. Касӆыты ай няврэмат ураӊан кочевой ашкуӆайт, детский садикат рупитӆат.
Нюрам муватан уӆты хоятат ураӊан ай куртат — факторияйт омасӆайт. Щита касӆыман уӆты ёх кеша верам ӆапкайт, пормас шавиты тахайт уӆӆат. Щита ёхтыӆыты мохет нянь вуӆат, щутщаӆат, ӆонщхопӆаӆ ӆэщатӆаӆаӆ, тутъйиӊкан понӆаӆаӆ. Щи тумпийн щита ёшан верам пормасӆаӆ тыныты рахаӆ.
Хащам таӆатан артан па муват эӆты ёхтыӆыты хоятат шоши уӆапса вантты хущты питсайт. Щи веран касӆыман па хуӆ веӆман уӆапса туты па этаӆтыты хоятата ям ох нётоп.
Щиты шоши хоятӆув йис уӆапсаеӆ еӆӆы туты нётӆайт, щит шеӊк ям. Еӆӆы там Овс мувеван уӆты хоятӆув уӆапсаеӆ яма, кентат, тащаӊа па нуптаӊа ат манаӆ! Шоши мирэв йис уӆапсаеӆ, рутэӆ-сырэӆ щират-пищат ант ат ёрэмаӆӆаӆ!
Валентина Рохтымова ханшам потар
Авторы
Лух Авт
Темы