Лух Авт
Уӆапсайӆ хуват шоши мир сортат туңматман уӆ
Хащам ятан ошаң верат туты ханты ики Александр Михайлович Константинов 75 таӆа йис, щишн «Торум Маа» нэмпи катра пормасат ӆаваӆты хотан етнхот ӆэщатман ус. «Торум Маа» музейн наука верат туты куща ӆаңкар нэ Раиса Решетникова па «Ёмвош ёх» арыты-якты таха куща нэ Фаина Иштимирова, — етнхот тусңан.
Етнхот умща ӆэщатман ус, щит туты нэңңан Александр Михайлович Константинов уӆапсайӆ эӆты инщассаңан, ӆув ёхӆы ястас, тухаӆ щёсан арыман потартас.
Мет сыры антеӆ-ащеӆ эӆты инщасса, ӆув ястас:
– Антем Тюменской область Армизонской районан сэма питас, щита энмас. 10-мет класс етшаптамаӆ юпийн ӆув Овас мува рупитты китса. Сурханӆ район Сытомино курта рупитты ёхтас. Щи порайн тата хуӆ па вой веӆпасӆаты вер, вуӆы тащ ӆаваӆты вер яма ӆэщатман ус. Ӆув тата ох ӆуңатты па маты нэңа рупитас.
Ащем Манстар район Шанш вош эӆты ус. Воӆаң Лялян лялясас, мушитман ёхи керӆас. Ӆув Сытомино курта рупитты китса, щита антем пиӆан уйтантас. Муң семьяеван ма па апщем сэма питсаман. Щаӆта ащем йиңка питас.
Там етнхот порайн антеӆ-ащеӆ нумман щира рут хотэӆ эӆты ар арыйс.
Тамхатӆ муң, мойң ёх, яң таӆ ёхӆы верам радиопередача хуӆантсув. Щита уйтаң шоши ёх Александр Константинов эӆты ям ясңат ястасат. Ӆый хоӆыена ястасат, Александр Михайлович шоши мира суртат туңматты нётаӆ.
Тамхатӆ А.М. Константинов ашкуӆайн утаӆтам пораеӆ эӆты нумаӆмасӆы: «Ма ай куртэман ашкуӆа антом ус, щишн кашң хатӆ няӆ верста хуваттыйн ванан уӆты вошаң ашкуӆая хухатӆысам, таӆ порайн ӆохан хататӆысам. Щиты айтэӆан юраңа-щомаңа йиты вер пеӆа самаңа усам, ин там таӆатан ищи ӆохан хататӆыӆам, шоши мир касапсаятан касӆам. Иса, ханнэху уӆапсаеӆ хуват рут ашкуӆаеӆ нумман тайӆэӆ, ма ищи ияха утаӆтыйм ёх пиӆӆам пиӆн тухаӆ порайн уйтантыӆам».
Еӆӆы ӆув ястас: «Челябинск вошан культура институт етшаптамем юпийн режиссёра йисам, Урай воша ёхатсам. Нумассам, мосаң, театр верты. Туп вошаң компартия ёхан вохсайм па инструктора рупитты партсайм. Щиты нэмоӆты порайн режиссёра ант рупитсам, туп режиссёр иты уӆапсаем ӆэщатсэм, ма, ванты, ёнтты ху!».
Щиты уӆапсайӆ хуват хус моӆтас таӆ арсыр тахаятан кущая рупитас. Етнхот порайн радиопередачайн ар хоят ястасат, Александр Михайлович округеван овас мир ош тахайт тыйты ураңан ар юр понас. Ӆув ар таӆ шоши мир уна ювам ёх тахайн кущая уӆ.
Яң таӆ ёхӆы уӆам передача охаль мир поэт Андрей Тарханов щиты ястас: «Югра мувеван нэмоӆты шоши мир ай курт антом, хата Александр Михайлович ант ус. Ма ӆув пиӆэӆан Нефтеюганск вош тыйм порайн, Сурханӆ вошан тутаң хопат яңхты хот пуншам порайн уйтантысам, щи тумпи ипуш, охаль мир верантты ху Пётр Шешкин хотан шияӆасэм. Манэм умащ, ӆув щи арат самаң юр тайӆ нушая питам хоятата нётты, ям ясңат ястаты. Тухаӆ порайн ӆув пеӆайӆ вантман нумасӆам, ӆув, матты ки, ош верат туты ураңан сэма питас. Ма хуван щимащ ям па умащ ханнэху пиӆн ӆухсаңа уӆӆам. Александр Михайлович Туром Ащи эӆты иса муй тайӆ, ӆуӆан хув йис ояңа-щуняңа ат уӆ».
Там етнхот порайн мойң ёх Александра Михайловича ар хошам ясңат потартсат.
Александр Михайлович айтэӆан ӆохан хататӆыты, унт хуват шушты, хуӆ веӆпасӆаты верат самаңа тайӆаӆӆы. Щи порайн ӆув хорамаң муват пеӆа вантаӆ па арыйӆ. Тамхатӆ «Ёмвош ёх» нэмпи арыты нэңат ӆувеӆа «Ма мувем» Алексей Сенгепован ханшам ар арысат. Щита хорам Югра мувев эӆты ханшман уӆ.
Ёхи хащам артан ияха шай инщсув, еӆӆы мойң ёх ӆувеӆа ар ям ясңат потартсат.
Александр Михайлович, 75 таӆа ювмаӆ ураңан ар тёпаң ясңат ястаӆам. Еӆӆы ищиты щи апраңа шоши мир йис уӆапса ӆаваӆман таи, хув йис, хув нупат таӆаңа уӆа!
Людмила Шульгина ханшам потар
Авторы
Лух Авт
Темы