Лух Авт
Нэпек ханшты айӆат ёх актащӆат
Округеван каш вантопсайт ӆэщатты (эӆты ӆаваӆты) департамент па Национальная библиотека ЯНАО ай тахайт потты тыӆащ яӊмет хатӆ эӆты катхощъяӊмет хатӆ унты «V Окружной фестиваль ямальской книги» мир хот верӆат. Щита РИК (редакционно-издательская комиссия) ЯНАО воӆаӊ ун потар туты питаӆ.
Ӆуӊтарат, потрат ханшты айӆат ёх, книгайт шавиты хотатан рупитты хоятат па аӆ книга ӆуӊатты хоятат хой овс мув эӆты ханшам нэпекат сама рахты вана тайӆэӆ Новый Уренгой вошан ӆаваӆӆайт. Хой тохи яӊхты номас понаӆ, интернетан, фестиваль страница хоща заявка ханшты верытаӆ.
Мойӊ хоятат кутан Нина Дашевская питаӆ, ӆув энамты няврэмат кеша ӆуӊатты нэпекат ханшаӆ. Шоши мувев па ДНР Волноваха вош эӆты веӆщи ӆуӊатты нэпекат ханшты няӆхощъяӊ айӆат ёх па щита питӆат, ӆув кутэӆан Софья Няч, Артём Посохин, Макар Окотэтто… Ханты хоятӆув эӆты там фестиваля Дмитрий Кельчин па Иван Сандрин вохсайтан.
«Ма ханты мувем, ма ханты хоятӆам такӆы хун ӆуӆан ма ханшты питсам. Кашӊ ясӊем, кашӊ потрэм ма шоши мувем хоятӆама юкантӆэм», — ханты айӆат ёх Дмитрий Кельчин потартмеман порайн ястас. Шоши муваӆ па уӆты хоятӆаӆ эӆты ӆув шеӊк самаӆ хошийӆ.
Фестиваль порайн Хон мув хуват потрат, ӆуӊтарат ханшты Союза пиӆтащам хоятат округеван ханшты айӆат ёх Совет верты номас понтсат. Ӆуӊатты нэпекат шавиты хотатан рупитты хоятат пиӆан веӆщи ханшты питам ёх каншты питӆат, верты верэӆ еӆӆы хатаӆтаты, утаӆтыты па ханшам нэпекӆаӆ таӆаӊа ӆэщатты нёттыя.
Зоя Куртямова ханшам потар
Авторы
Лух Авт
Темы