Лух Авт
«Ӆух Авт» сэма питам хатӆ
Яӆап таӆан хутмет хатаӆан, воӆӆы хольмаң пеӆа хуӆам таӆа йиӆ, хоты муң округеван мет оӆаң газетаев ханты ясаңан этас. 2001-2017-мет таӆ унты няӆ лопсаң питы-нови ольпаң ус. Ун кер тыӆащ 2017-мет таӆ эӆты газетаев хорам ольпаңа йис. Кен ӆуңатты ураңан, ханшты потарӆув аяшак верӆаӆӆув, катра щиран аршак хор понӆув, ханты хоятӆув иса ат уятӆайт.
Оӆаң тыӆащ 2020-мет таӆ эӆты газетаев кат пуш уна йис. Ин там хатӆ унты нийӆ лопасан этаӆ. Аршак хоят газетаев ӆуңатты ураңан ӆорвош ясаң тумпийн Кев сыӆ мув па Хаӆэват Пелак хантэт ясаңан ханшты питсув.
Яӆап рубрикайт этсат: хуӆам оӆаң лопасан хон муван уӆты айкеӆат эӆты потар туӆув. Хоӆна «Финно-угор ёх мир», «Тус ясаң — тус потар», «Щущие», «Ӆуңтар лопас», «Муң хоятӆув», «Воӆаң Лялян нох питам тови» лопсат этӆыӆат.
Внештатной корреспондента рупитты хоятӆув: Людмила Тихоновна Гурьева, Владимир Егорович Енов, Антонина Егоровна Сязи, Ольга Николаевна Пандо, Галина Пенчакувна Кечимова, Валентина Петровна Лонгортова па Ирина Макаровна Косачёва лопсат ханшты порайн шеңк ун нётапса версат.
Геннадий Павлович Кельчин — «Ӆух Авт» газетаев мет оӆаң главный редактора ус. Ӆув анта туп округеван уятӆа, мув керытман па хон муватан нэмаӆ па хуӆӆыса. Корреспондент, ӆуңатты нэпек ханшты ху, монщат толмащаӆ па хорам хорат вераӆ ин тамхатӆ унты член Союза писателей России хоща ӆоңман уӆ.
Хоты оӆаң сыс газетаев тыйс, Геннадий Павлович китам ясаң ӆуңтаты: «Оӆаң кут ӆаварт ус рупиттыя. Редакций хоӆна, оӆаң сёс рупата хот ант тайс. Камн тахайн рупитты места митаӆыса. Ям хоят уӆ — нётсаюв. Хор верты иси воӆаң ант хошӆув. Си порайн Иван Иванович Сычёв шуңат хоӆна ӆыӆаң. Ӆув хор мийӆыйс. Сяӆта па ин там уӆ, Хабэча Хываревич Яунгад, «Няръяна Нгэрм» газета кусяя рупитас, шеңк ун нётап верас. Хор маӆ, си кут утаӆтаӆӆы хоты газетаев туңа сира вертыя.
Ханты мир, ма нумастэман, хув ӆайӆасас хун тамась газета тыйӆ. Евгений Ильич Ямру си порайн миран округев Государственной Думая пирыман ус. Ӆув мосты сиран нэпекат ӆэсятас. Округ мет ун кусяев Постановлений ёш посна понтсаӆӆы. Си юпийн ханты хоятат айкеман ханты ясаңан газета ӆуңатты питсат.
Мет оӆаңан, Муши вошан специальной корреспондента рупитты питас Николай Никитович Нахрачёв шуңат. Касам-Нёӆ эӆты уӆам ху. Ханты ясаңан яма потрат ханшас, русь ясаңан иси ёхӆы ант ӆойс. Си хорпи ясңаӆ юраң. Яң моӆтаскем таӆ рупитас ӆув муң газетаеван. Касьтыӆэв.
Газет пуншам уш эӆты Аллина Кирилловна Яковлева (Тоярова) рупитаӆ. Ӆопхары вош эӆты уӆты нэ. Ханты ясаңан яма потартаӆ па яма потрат ханшаӆ, хор вераӆ. Яма рупитам тахаяӆан камн сир грамота па диплом тайӆ. Ун местайн утаӆтыйс, верытаӆ юриста рупиттыя.
Ответственной секретарь рупата Клавдия Павловна Макарова тайс. Ӆув русь ясаң па ханты ясаң утаӆтаты нэңа утаӆтыйс. Сишна куш русь ёх сиран, куш ханты сиран яма ханшас. Ӆув ханшты потарӆаӆ умась ӆуңатты, муң ханшты ясаңӆув иса вантман тайсаӆӆы, парта сиран ханшты ясаң туңапӆаӆӆы, мосты сиран ханшӆаӆӆы. Ханшты потарӆув, верам хорӆув вёрсткайн верӆаӆӆы. «Щущие» лопас эӆты ищи ӆув номас мас. Тус ӆуңтарат ханштыя Надежда Николаевна Конева шуңат ус. Прокопий Ермолаевич Салтыков шуңат ӆуңтарат иси поныӆысув. Хоӆна па ар ям хоят газетаеван рупитас, хоӆыена нумӆаӆӆув.
Ин этты «Ӆух Авт» нэпекев еӆӆы ат этаӆ, ханты уӆапсаев эӆты потрат туӆ. Нын па ханты мир хоятат еӆан аӆ ӆояты, моӆты айкеӆат китаты, ханшаты. Яӆап таӆ пиӆан! Тумтак уӆапса па яӆап хатӆ!»
Зоя Куртямова ханшам потар
Авторы
Лух Авт
Темы