Лух Авт
Умащ потар тувемийс
Мосванан Пулӊават вошан ма Маргарита Константиновна Шиянова пиӆан уйтантысам. Ӆув манэма сыр-сыр умащ потрат тус па айкеӆат ӆэщатас.
Там нэ Вандиязы куртан Ӆорвош районан хуӆ-вой веӆпасӆаты хоттэӆ хоятат хотан сэма питас па энмас. Вандиязы курт ям рущ ясӊа ки толмащтаты, щит «вантты-я-са» нэм тайтыя питаӆ. Щимащ хорамаӊ нэм туп хантэт ӆый уӆты-хоӆты тахайӆаӆа туса маты йис порайт вуш эӆты верытсат.
Тамхатӆ Маргарита Константиновна Ӆорвошн пенсияйн уӆ па моӆты верат такӆы ищипа ёӆан ант омасаӆ. Ин «Ӆорвош нэӊат па Ӆорвош ху» якты-арыты хот куща нэӊа рупитаӆ. Ӆув ясӊаӆ эӆты оша пайтсэм, муй ураӊан щи тахаеӆ щимащ нэм тайӆ. Ванта, ӆый якты-арыты хотэӆан ин тамхатӆ ӆапат нэ аратэӆан уӆ па йи ики тайӆат. Щи хоят, Владислав Ильич Кельчин, куш ёнтасты, куш арыты, куш якты муй йис монщат монщтыя иса хоштаӆ па кашӊ пораятан сыр-сыр емаӊ хатӆата ищиты яӊхаӆ.
Щиӊанща айкеӆ тувам нэӊем арсыр йис верат эӆты манэма потартас. Матты ки катрашак ӆый Ӆухпаткуртэӆ пуӊаӆан хуӆам километра вушн Вуры вош уӆмаӆ. Щи ханты куртан Воӆаӊ ляля яӊхам ики Иван Иванович Кондыгин хуӆ па вой веӆпасӆас. Ӆув ясӊаӆ эӆты, матты ки йис порайн нови ёх пеӆа уӆам хоятат щий ёхтыӆысат па куртан уӆам хоятат паратсат. Щит ураӊан юхат щи ай куртые Вуры воша нэматса. Щаӆта па Ӆухпаткуртэӆ кимет пелакан Шиянпухар уӆ. Щи тахайн катра па хоятат усат. Ханты ясӊа ки кератты, щит «шийтаӊ пухар». Там йисн Ӆухпаткуртан туп Маргарита Константиновна апщеӆ уӆ па туп-туп еӊк Ас хоща нопатӆа, ӆув ныкӆы пеӆа Шиянпухра манаӆ па хуӆ веӆпасӆаӆ.
Ёхи хащам ясӊаӆан айкеӆ верам нэӊем потартас, хоты тамхатӆ «Ӆорвош нэ па Ӆорвош ху» якты-арыты тахайн уӆты хоятат шеӊк самаӊа па мосман ай муй уншак верат ӆэщатӆат. Туп щи вер вевтам, хоты айшак ёх ӆый хощаеӆа яктыя па арытыя еӆэмӆаӆат, щит ураӊан там йисн иса ант па ёхатӆат. Щимащ хоятат пиӆан муӊ рупатаев щирн кашӊ пуш иса уйтантыӆув па потрэмаӆув.
Владимир Енов ханшам потар
Авторы
Лух Авт
Темы