Лух Авт
Ун йиңк порая ӆэщатыман уӆты мосаӆ
Округеван кашң товийн няӆ курт ун йиңкан амарӆаты верытӆайт. Щит ураңан Тарко-Сале вошан, Овкуртан, Антипаюта па Уренгой куртатан ун йиңк эӆты сайӆаты рупатайт верты питсайт. ГКУ «Ямалспас» па тут хуратты отрядатан рупитты хоятат утаӆтасайт, хоты йиңк эпатты порайн, муй верты хошты мосаӆ.
Ун йиңк порайн, Овкуртан, курт оӆаңан омасты хотат лап амарӆаӆайт. Ёхан питараӆ ун йиңк эӆты сайӆаты кеша туняӆ так щашкан эӆты верам ӆытоват ӆутсайт. Вер этты порайн, хоятата нётты ёх рупатайӆаӆ сора верты ураңан, щи ӆытоват лакки ӆарпитсаӆӆаӆ па ӆыпиӆаӆ йиңкан тэкаптасӆаӆ. Щаха, щи кеша верам йиңкан понам хув ӆытоват ёхан питар хуват понӆайт.
Хотӆаӆ йиңкан вуйм хоттэӆ хоятат оӆаң сыс хоӆта манӆат, ӆэтот, ӆуматты сох хоӆща вуӆат, щит эӆты Овкурт куща ху Иван Григорьевич Рочев потар тус: «Куртэв шаңкап йиңкан амарӆаӆа ки, сот ветхощъяң хоят интернатан уӆты верытаӆ. Ай няврэмаң хоятата атэӆ комнатайт ӆэщатӆув. Ван кут уӆтыя мосмитты пормас иса уӆ. Мушаңа йитыйн, интернатан леккар рупитты кабинет уӆ, ашкуӆайн ӆэтот кавартты хот тайӆув».
Хоты вера питтыйн, МФЦ па социальной защита хотңан рупитты питӆаңан, мосты нэпекат, муй щиран туңа-щира ӆэщатты, нётапса ох ёша пайтты ураңан муй арат ӆавӆасты мосаӆ, хоятат сайӆаты па тут верат пиӆан рупитты департамент ЯНАО ёхтыӆыйм кущайт щит па ӆэрапсат.
Зоя Куртямова ханшам потар
Авторы
Лух Авт
Темы