Лух Авт
Ун вошаӊ ханты сый
Ас нопатты тыӆащ 24-мет хатаӆан Пулӊават вош ОЦНК каш верты хотан ханты ёх артан актащисат. Вошан уӆты ханты хоятӆув рут ясӊев ант ёрэматы ураӊна, кум шитман, ивеван ияха уйтантыӆат.
Хой ӆытаӆ ханты ясаӊна арыты, якты па нарасӆаты Окружной центр национальных культур хоща яӊхты верытаӆ. Няврэмат па ун хоятат кеша таӆаӊ хуӆам коллектив уӆ.
Мет ай няврэмиет «Мурхи сун» нэмпи ханты фольклорной группа пиӆан Наталья Фёдоровна Ребась рупитаӆ. Ӆапатан каматса пуш ияха уйтантыӆат. Ханты арат па ӆуӊтарат утаӆтаӆат.
Еша уншак эвиет, похат па «Сорни тутые» нэмпи ханты группа хоща нарасъюхан па тор сапаӆан нарасӆаӆат. Щита няврэмат пиӆан рущ ики, Валерий Григорьевич Прыжанков рупитаӆ. Ханты арат па ёнтапсайт пеӆа ӆув шеӊк самаӊ. Щишан, ханты мир пеӆа ӆув ун онтас туӆ.
Ун хоятат па «Овас мувие» ханты фольклорной коллектив хоща яӊхӆат. Татьяна Ивановна Енова вошаӊ ханты хоятат, кум шитман, ияха акатаӆ. Ӆув уйтантыӆат па ханты арат арыӆат.
Каш верты ханты хоятӆув, муй таӆ шуп сыс утаӆтысат па муй версат — этаӆтасат. Щи ураӊна концерт ӆэщатсат. Аратаӆ ӆув хус моӆтас номер альсат. Арсыр рут вошаӊ хоятат умащ ханты ясаӊ хуӆантты па вантты ёхтыӆысат.
Иван Сандрин ханшам потар
Авторы
Лух Авт
Темы