Лух Авт
Уншак тахайн утаӆтыяты, ошаңа ювантыяты
Ин арпелак няврэмат ашкуӆа пораеӆ хащас, еӆӆы нумасӆат, мата воша манты, хота утаӆтыты. Ӆув тумпиӆаӆан, аңкет-ащет охӆаӆ ищи шивемиӆат, няврэмеӆ эӆты нумасыӆат.
Тата ма вутщиӆам Венера Гришкина эӆты ханшты. Мосаң матты няврэм А.И. Герцен нэмпи Российской государственной педагогической университет Институт народов Севера хоща утаӆтыты ӆаңхаты питаӆ. Ин, там йисан, Хон Петра вош унты кеншак тохӆаң хопан манты. Щи тумпийн муваӆ хошамшак, хатӆаӆ наяңшак.
Там энамты нэңиев ХМАО-Югра Казым курт эӆты ун воша утаӆтыты ёхтас. Муя ӆув номас понас там воша ёхатты, щит эӆты Венера пиӆан потарсаман.
– Ма ай пора эӆты шеңк ӆаңхасам Хон Петра вошан утаӆтыты. Щи порайн няӆхощъяңкем таӆпи эвия усам. Ин ма РГПУ А.И. Герцен нэмпи университетан Институт народов Севера хоща культоролога кимет курсан утаӆтыӆам. Там еӆпийн Ёмвош педагогической колледжан утаӆтысам.
– Наң ханты ясңен яма уйтӆэн? Ёӆан аңкен-ащен пиӆан рут ясаңан потартыӆты?
– Аңкем-ащем кутӆанан потартыты порайн ма ясаң яма хуӆӆам. Воӆаңа ӆапатмет классан утаӆтыты питсэм. Ин унашак ювмем юпийн номасан ёхатсайм рут ясңем ванан тайтыя. Ванты, ясңев шеңк умащ, Ас йиңк иты оваӆ. Ханты ясаңан потрат па ӆуңтарат ханшам хоятӆув эӆты ӆуңтыӆыӆам. Ӆув нэш, щи хорпи умащ потрат тайӆат.
– Аңкен па ащен Казыман уӆӆат, муй па касӆыман яңхӆат?
– Там еӆпи таӆатан касӆыман яңхсув. Ащем Геннадий Илларионович Гришкин. Уӆмаӆ хуват иса вой-хуӆ веӆпасӆыйс. Аңкем Наталья Степановна ащема иса нётыӆыйс, муңев энмаӆтыйс. Ёӆан иса нэ вер верыӆыйӆ: ёнтасаӆ, татӆасаӆ, пут кавартаӆ… Ин куш куртан уӆӆаңан, ищипа ханты мир уӆапсайн еӆӆы туӆңан. Ищиты хоӆап омпсыӆыӆңан, ӆэты кем хуӆ мощатыӆңан. Муң хощаев арпелак ӆар, сорт, ханшаң хуӆ хойӆыйӆ. Ма рутӆам пиӆан Ёмвошан ищи хоӆпа яңхиӆысам, хун щита утаӆтысам.
Ма ащикем Степан Волдин, ӆув ёшӆаӆан пун верыӆыйс, хуӆ па ондатра мощатыйс. Ӆаңкар ухаӆ, ӆуп, ай хоп, порли иса щи верты хошас. Ӆапкайн тамащ мосты ханты пормас ант тыныӆа.
– Нын ар няврэмаң семьяя ӆуңтасӆаты, наң тумпенан няврэмат па уӆӆат?
– Ма тумпеман кат опи па уӆ. Йи опем Казым куртан уӆ, хольмаң таӆа йис. Кимет опем тата, Хон Петра вошан уӆ. Ӆын ищи там вошан утаӆтысңан. Ӆын туп па рупата щира утаӆтысңан. Хоятата уӆапса туңматты па хорам туты щира.
– Венера, пумащипа наңен! Еӆӆы яма утаӆтыя, ям рупата хар пирыя, кущая ювиӆыя!
Аллина Тоярова ханшам потар
Авторы
Лух Авт
Темы