обновлено: 12:01, 22 февраля 2023
Лух Авт
Унт вой сохат па веӆпас верат эӆты вантопса
«Торум Маа» йис пормасат шавиты хотн мет оӆаң «Унт вой сохат па веӆпас верат» вантопса ус. Россия хон пелак мувевн йис вушат эӆты арсыр хоятат уӆты хуватн вой веӆпасӆасат.
Ванта, йис порайт вуш эӆты туп ханты па охаль мирңан веӆпас верӆаӆ онтасн уӆты-хоӆты щирӆаӆ ӆэщатсат. И пелак эӆты веӆпасӆаты ёхат ӆэтот ураңан унт войт па тохӆаң войт веӆсат, кимет пелак эӆты — тухаӆ унт войт тынаң сохат тайсат. Щитат, ванта, еӆӆы пелаттыя муй тынытыя рахас. Щимащ вер ураңан рущ хон пелак ёх шеңк муң рут мувева вуратсат. Ванта, кашаң хатнэху ямсыева па тащаңа уӆтыя-хоӆтыя ӆаңхас.
«Торум Маа» хотн арсыр проектат верты таха куща Вячеслав Кондин потартас, хоты катра порайт эӆты муң мувева рущат ёхатсат. Итат унт вой сохат шоши хоятат эӆты ӆутсат. Кимет ёхат тата уӆты щирӆаӆ ӆэщатсат. Ӆув щёркан омасты щират ванӆтас па потартас, муй щирн щимащ веӆпас вертыя. Щаӆта нымӆат па сув аляс, мата отат онтасн воя яңхсат. Кашаң унт вой ураңан, ванта, атэӆт нёӆ ус.
Йис порайн юхаӆ верты ёх шеңк самаңа па мосман хоятатн тайсайт. Мосаң, щи ураңан ханты мирэв юхӆат тухаӆ порайн карты пошканат тынат вуша ёхтыӆысат па и хорпи тын щирн веӆпасӆаты ёхатн щи ӆутсайт. Щаӆта йис порайн ясак маты хатаӆн матты хатнэху нэмоӆты унт вой сох ант ки хоӆамтас, щит лув вой сохӆаӆ юкана, арнайӆ щирн, ӆув веӆпасӆам юхӆаӆ щий мас. Ванта, щи юхӆаӆ юхатшак аршак вой сохат шитам хоятӆаӆн нох ӆуттыя верытса.
«Торум Маа» йис пормасат шавиты хотн, Вячеслав рупитты ёхӆаӆ пиӆн, 2006-мет таӆ вуш эӆты «Вой веӆпасӆаты ёх юш» ӆэщатсат. Щи еӆпийн айшак муй уншак ханты куртат эӆты унт вой веӆпасӆаты хоятат эӆты сэсэт, щёрканат па арсыр веӆпас пормасат ияха акатсат. Кашаң хатнэху щи «Вой веӆпасӆаты ёх юша» яңхты верытӆ па вантты, муй щирн па хоты катра порайн опращ ёхӆув унтатн вой веӆпасӆасат.
Там вантопсайн арсыр унт вой хорат, веӆпасӆаты ёх ӆуматты сохат, нымӆат, суват, антпат па веӆпас пормасат вантсув. Щитат иса катра ханты па охаль мирңан вой веӆпасӆатыя хоятатн уӆапса щирн тайсайт.
Владимир Енов ханшам потар
