Лух Авт
«В потоке вечности» ханшам нэпек мира этаӆтаса
Моӆхатӆ «Наследие» нэмпи ӆуӊтап хотан Юлия Николаевна Накова «В потоке вечности» ханшам нэпек мира этаӆтаса. Мет шопаӊ ханты мир кутан Юлия Николаевна шеӊк яма уйтӆа. Мет оӆаӊан, хоты ӆув радио хуват потрат тус. Хоятат кашӊ пуш радио пуӊӆа опсыӆысат па хуӆантсат, хоты сахат Кев пуӊаӆан уӆты хантэт ясаӊ щащаӆ, муй ям потар ӆув тамхатӆ рут мувеӆ эӆты хуӆатӆат.
Юхат, хун Юлия Накова телевидение хоща рупитты питас, телевизор пуӊаӆан омассат па вантсат. Муй хорпи нэш хорамаӊ мув суӊан уӆӆув. Хантыӆув па щикем хорамаӊ ӆуматты сохан яӊхӆат. Вантты умащ! Щи тумпийн аратаӆ альсаӆӆы хуӆ, вой, тащан яӊхты мохиӆув уӆапса. Хорамаӊ хорат ванттэв тумпийн, щита ӆув атаӊ-хатӆ уӆты уӆапсаеӆ альман уӆӆа. Щикуш ӆавартаӊ, туп туӊа-щира вортапса, юр па щём тайты хоятат муӊ ханты мир уӆапсаев еӆӆы туӆат, ясӊев шавиӆат.
Щи тумпийн ӆув Воӆаӊ Ляль порайн уӆам, рупитам, сэма питам хоятат пиӆан уйтантыйс. Щи шукаӊ порайт эӆты потрат, нёхты хорат верас. Тамхатӆ щи кина хорат вантмев порайн, мохты щи наӊ уйтам хоятэн эӆты самен хошийӆ, нумаӆмиӆэн, сэмъйиӊкен эсӆамтыӆэн.
Там ияха актам потрат онтасан «В потоке вечности» ӆуӊтап этас, щита Воӆаӊ Ляль порайн рупитам, ляль хара яӊхам ханты хоятат эӆты потрат акатман уӆӆат. Щи нэпек ӆуӊаттэн порайн мохты нумаӆмаӆан, хоты щи пораятан наӊ овращӆан па щащиӆан усат. Ищиты торан сэварты, хуӆ веӆпасӆаты, хонна ай няврэмат ӆаӊки веӆты харата китыӆысаят. Йиӊкан руӊкатӆыман павартат перытсат… Хуӆ па нёхи соӆысат па ляль харата китыӆысат. Атаӊ-хатӆ рупитам хоятат щи порайн хонна номасан ант ёхтыӆысайт — ӆув ун онтас верӆат, ӆув онтасэӆан муӊ ищи Воӆаӊ Ляльн нох питсув.
Щишан там нэпекан ёша вуяӆан, ӆуӊтаӆан, мосты па ошаӊ нопсат ох веӆмана понаӆан.
Аллина Тоярова ханшам потар
Авторы
Лух Авт
Темы